CEBU, Philippines — Si Zach LaVine mipabuhagay og 36 puntos aron pangulohan ang Chicago Bulls ngadto sa 117-108 nga pagpakurat sa defending NBA champion Boston Celtics kagahapong adlawa samtang si Los Angeles Lakers superstar LeBron James mihimo na sab og kasaysayan.
Eksplosibo kaayo si Lavine nga mipasud og 11 sa 19 niya ka itsa apil na ang unom ka -pointers samtan midugang og unom a rebounds ug upat ka assists alang sa Bulls nga miinat sa ilang baraha ngadto sa 13-15.
Si Ayo Dosunmu miamot og 17 puntos sa Bulls, samtang si Nikola Vucevic mipupo og 16 puntos ug 14 ka rebounds.
Ang Bulls milusad og nagkayong 35-22 rally sa katapusang kuwarter aron tumbahon ang Celtics.
Si Jason Tatum mipabuto og 31 puntos ug 10 ka rebounds samtang sila si Kristaps Porzingis ug Jaylen Brown nagkumboya'g 39 puntos apan wala mosaler ang maanindot nilang salida sa Celtics ning higayona.
Sa laing bahin, si James mibuak sa NBA all-time record ni Kareem Abdul-Jabbar alang sa labing daghan nga minutos nga naduwa sa ilang karera human siya mipatak sa ika-57,447 niyang minuto sa korte atok sa 113-100 nga kadaogan sa Lakers batok sa silingan nilang Sacramento Kings.Si James mi-iskor og 19 puntos samtang si Austin Reaves mitali og 25 puntos ug si Anthony Davis mipupo og 21 puntos ug 20 ka rebounds alang sa Lakers.
Didto sa San Antonio, si French star Victor Wembanyama mipabuhagay og 42 puntos aron ituboy ang Spurs ngadto sa 133-126 nga pagpiog sa Atlanta Hawks sud sa overtime.
Sa ubang mg resulta, si Shai Gilgeous-Alexander mipaulbo og 35 puntos sa dihang gipayaka sa Oklahoma City Thunder ang Orlando Magic, 105-99, ang Memphis Grizzlies mikastigo sa Golden State Warriors, 144-93, samtang si Karl-Anthony Towns miposte og 32 puntos ug 20 ka rebounds aron agakon ang New York Knicks ngadto sa 133-107 nga pagpahilom sa Minnesota Timberwolves, 133-107.
Ang Fil-Am nga si Jalen Green milansang og 34 puntos ug si Dillon Brooks miamot og 26 puntos sa dihang gipakaging sa Houston Rockets ang New Orleans Pelicans, 133-113, sila si Norman Powell ug James Harden nagkumboya'g 53 puntos sa dihang gipaluhod sa LA Clippers ang Dallas Mavericks, 118-95, samtang si Pascal Siakam mikolekta og 25 puntos ug 18 ka rebounds sa dihang gipasaop sa Indiana Pacers ang Phoenix Suns, 120-111.