Bolts, Beermen nahagba sa Korea

CEBU, Philippines — Ang mga pambato sa PBA nga Meralco Bolts ug San Miguel Beermen parehong nahisukamod atol sa tagsa-tagsa nila ka mga duwa sa East Asia Super League (EASL) 2024-25 niadtong Miykerkules sa gabii didto sa             Korea.

Didto sa Busan Sajik Gymnasium, ang Busan KCC Egis mipayaka sa Bolts, 72-68, alang sa una nilang daog.

Ang Bolts wala maka-iskor sa pinal nga 3:14 sa duwa hinungdan nga nakatilaw sa ikaduha nilang pilde, samtang ang Busan mipakgang sa tulo ka sagunson nilang malas.

Si Heo Ung mibomba og pito ka 3-pointers sa iyang 31 puntos nga iyang gipalamanan og upat la assists alang sa Busan.

Miaabag kaniya si Deonte Burton nga miharos og 26 puntos, 14 ka rebounds, lima ka assists, tulo ka steals ug usa ka block alang sa kampo sa mga Koreano.

Si David Kennedy mitapos uban ang 23 puntos ug siyam ka rebounds samtang si Akil Mitchell miposte og double-double nga 17 puntos ug 18 ka rebounds alang sa pilderong Bolts.

Sa laing bahin, ang Beermen nagpabiling way daog human sila miyukbo sa Hong Kong Eastern, 71-62, didto sa Southorn Stadium.

Si Kobey Lam mikadlit og 19 puntos ug tulo ka assists samtang si Chris McLaughlin mi-iskor og 16 sa dihang giputol sa Hong Kong ang duha ka sunod-sunod nilang pilde.

Sila si Torrent Jones ug June Mar Fajardo mipupo og 19 puntos matag usa alang sa Beermen nga bokya gihapon human sa tulo ka duwa.