3rd Rey Gealon chessfest karong Sabado
CEBU, Philippines — Sa katapusang higayon ning tuiga, ang mga hait nga magduduwa og ahedres sa Sugbo magtakos sa ilang abilidad sa 3rd Councilor Rey Gealon Chess Tournament nga gikatakda karong Sabado, Disyembre 21, diha sa Cebu Chess Club nga anaa mahimtang sa 4th floor sa Robinsons Galleria Cebu.
Miabot ngadto sa P30,000 nga ganting salapi ang ipangapud-apud ngadto sa mga mananaog ning siyam ka hugna nga kompetisyon nga gipasiugdahan ni Cebu City Councilor Atty. Rey Gealon inabagan sa Cebu Executives and Professionals Chess Association (CEPCA) nga gipangulogan ni Engr. Jerry Maratas.
Ang makampiyon mobulsa og P7,000 samtang ang mopahiluna sa ikaduha ngadto sa ikalimang dapit mo bitbit og P5,000, P3,000, P2,000 ug P1,000. Ang 6th ngadto sa 10th mokubra og P700 matag usa samtang ang 11th-15th adunay P500.
Ang top collegiate, Cepcan A ug B, lady, senior (60-above), high school (16 Under), elementary (12 Under), ug boys and girls 10 Under makadawat sab og insentibo. Ang rehistrasyon nagkantidad og P250 apan ang mga Cepcans, senior citizens, PWDs, ladies ug mga bata nga nag-edad og 12 anyos paubos adunay P100 nga diskwento.
Alang sa dugang impormasyon, mahimong mokontak nilang National Arbiters Kevin Yap (09458559800) ug Edwin Cablao (09171383181).
- Latest
