Mavs, Warriors mikulit og NBA record

CEBU, Philippines — Si Luka Doncic mirehistro og triple-double uban ang 45 puntos, 13 ka assists ug 11 ka rebounds aron pangulohan ang Dallas Mavericks ngadto sa 143-133 nga kadaogan batok sa Golden State Warriors sa eksplosibo nilang duwa nga mikulit og NBA record kagahapong adlawa didto sa Chase Center sa San Francisco, California.

Ang Mavs ug ang Warriors nagkumbinar og 48 ka 3-pointers nga nasud nga maoy labing daghan sa usa ka duwa sa kasaysayan sa NBA.

Ang Warriors naka-igo og 27 sa 54 nila ka tres, samtang ang Mavs milansang og 21 sa 41 nila ka 3-pointers aron buk-on ang karaang marka nga 44 nga gikulit sa Sacramento Kings ug Los Angeles Clippers niadtong Pebrero 2023 ug gitabla sa Phoenix Suns ug Utah Jazz tulo ka adlaw pa lamang ang milabay.

Bangis kaayo si Doncic nga mipasud og 16 sa 23 niya ka itsa apil na ang unom ka tres. Midugang siya og tulo ka steals ug duha ka blocks sa ikasiyam nga triple-double sa iyang karera diin siya mibomba og dili mominus 40 puntos.

Sa first half pa lang daan, ang Warriors ug ang Mavs miposte na og rekord human sila marapido og 30 ka tres.

Ang ika-45 nga tres ni Klay Thompson sa pinal nga 4:32 sa duwa maoy opisyal nga nakabuak sa karaan nga rekord.

Si Thompson mitapos uban ang 29 puntos alang sa Mavs, 12 niya iyang gibubo sa unang kuwarter. Mipasud siya og siyam sa 14 niya ka tira apil na ang pito ka tres batok sa kanhi niya team diin siya nakadaog og upat ka kampiyonato.