Beermen inihulog ang Dyip sa 0-5
MANILA, Philippines — Panalo ang ibinigay ng San Miguel sa nagbabalik na si coach Leo Austria matapos paluhurin ang Terrafirma, 106-88, sa Season 49 PBA Commisioner’s Cup kahapon sa Ninoy Aquino Stadium sa Malate, Manila.
Itinaas ng Beermen ang kanilang baraha sa 2-2 tampok ang pagpaparada kay bagong import Torren Jones na pumalit kay Quincy Miller.
Umiskor ang 6-foot-9 na si Jones ng 24 points, habang humakot si eight-time PBA MVP June Mar Fajardo ng 21 points, 19 rebounds at 7 assists.
Nagdagdag si CJ Perez ng 16 markers at may 12 at 10 points sina Juami Tiongson at Don Trollano, ayon sa pagkakasunod.
Sa pagbabalik naman ni Austria sa top post ay inilagay si dating mentor Joge Gallent bilang team consultant.
Sa Christmas Party lamang ng SMB Corporation inihayag ang pagluluklok kay Austria.
“Hindi ako nakatulog because there’s a lot of pressure,” wika ni Austria sa pagsagip sa kampanya ng tropa. “In the PBA you cannot take teams lightly eh. Lahat competitive eh.”
Bagsak naman ang Dyip sa 0-5 marka at nakakuha kay import Brandon Edwards ng 18 points at may 14 markers si rookie Mark Nonoy.
Isinara ng San Miguel ang first period tangan ang 47-39 bentahe patungo sa 52-41 paglayo sa third period.
Hindi naman bumitaw ang Terrafirma at nakadikit sa 64-65 sa 3:01 minuto nito mula sa three-point shot ni Stanley Pringle.
Iyon na ang huling pagkakataon na nakalapit ang Dyip.
Mula sa 73-66 third quarter lead ay umarangkada ang Beermen para ilista ang 20-point lead, 94-74, sa 5:56 minuto ng laro.
- Latest
