Wong sa susunod na taon pa makakalaro - Alinsunurin
MANILA, Philippines — Posibleng sa susunod na taon muling makita sa aksyon si fan favorite Deanna Wong ng Choco Mucho sa kanilang kampanya sa Premier Volleyball League All-Filipino Conference.
Sinabi ni Flying Titans coach Dante Alinsunurin na nagsisimula pa lamang humawak ng bola si Wong sa kanilang mga training sessions.
“Siguro ngayon, nag-start na rin siyang mag-training ng bola,” wika ni Alinsunurin sa Cebuana setter. “By next year, makikita ninyo na siya.”
Ang kanyang tuhod ang naging problema ni Wong kaya hindi nakakalaro para sa Choco Mucho na umiskor ng pahirapang 25-20, 25-21, 21-25, 25-27, 15-12 panalo sa Farm Fresh noong Huwebes.
Sa patuloy na pagkawala sa eksena ni Wong ay si Mars Alba ang sumalo sa kanyang naiwang trabaho.
Naglista si Alba ng average output na 3.92 excellent sets per set para sa Flying Titans na tinapos ang dalawang sunod na kamalasan sa pagtakas sa Foxies.
“Coming sa dalawang talo namin, gusto naming manalo kasi bago magbakasyon para iba ‘yung confidence namin pagbalik next year,” wika ng dating De La Salle Lady Spikers’ setter.
Umaasa si Alba na ito na ang simula ng pagbangon ng Choco Mucho.
“Kulang pa. Kailangan lang trabahuin talaga para sa mga susunod na game, mas handa pa kami sa puwedeng mangyari,” dagdag ni Alba.
Sunod na lalabanan ng Flying Titans ang ZUS Coffee Thunderbelles sa Enero 18.
- Latest
