Kennedy bumida sa pagkuryente ng Bolts sa Dyip
MANILA, Philippines — Hindi nagkamali ng pagpili ang Meralco kay import DJ Kennedy.
Iniskor ni Kennedy ang 29 sa kanyang 32 points sa second half para tulungan ang Bolts sa 96-91 pagkuryente sa Terrafirma Dyip sa Season 49 PBA Commissioner’s Cup kahapon sa Ninoy Aquino Stadium.
Dumiretso ang Meralco sa ikatlong sunod na panalo para sosyohan ang NorthPort sa liderato, habang bagsak ang Terrafirma sa ikaapat na dikit na kamalasan.
Pinili ni coach Luigi Trillo ang 6-foot-6 na si Kennedy, naging teammate ni Justin Brownlee ng Barangay Ginebra sa St. John’s College, kumpara sa 6’11 na si naturalized center Ange Kouame bilang kapalit ni injured Akil Mitchell.
Nag-init ang mga kamay ni Kennedy sa third quarter para ibigay sa Bolts ang 16-point lead, 67-51, sa 4:42 minuto nito.
Ito ay matapos na ring kunin ng Dyip ang 40-39 halftime lead.
Sa likod nina Vic Manuel, Brent Paraiso at Aljohn Melecio ay nakatabla ang Terrafirma sa Meralco sa 91-91 sa huling 1:05 minuto ng fourth period.
Ang krusyal na three-point shot ni Jansen Rios sa nalalabing 9.4 segundo ang naglayo sa Bolts sa 94-91.
Tuluyan nang isinuko ng Dyip ang laban matapos ang inbound error ni Paraiso.
- Latest
