UV Baby Lancers mihimo'g kasaysayan labing unang under 15 champion sa CESAFI basketball
CEBU, Philippines — Si Vandolf Franky Urdaneta mipaulan og 3-point nga mga bomba sa overtime sa dihang gipatikangkang sa University of the Visayas (UV) Baby Lancers ang Cebu Eastern College (CEC) Dragons, 57-48, sa tinagakay nga duwa sa ilang best-of-three finals series aron mamahimong labing unang Under 15 basketball champion sa Cebu Schools Athletic Foundation, Inc. (CESAFI) niadtong Miyerkules sa gabii, Disyembre 4, didto sa Cebu Coliseum.
Ang Finals MVP nga si Urdaneta mikadlit og 13 puntos, lima ka rebounds, tulo ka blocks ug usa ka steals aron pangulohan ang Baby Lancers ngadto sa makasaysayanong korona.
Labaw lamang og usa ka lugas, 46-45, sa nakaon nga 40 segundos sa lima ka minuto nga ekstensiyon, si Urdaneta kalit nga nanginit dayong lansang og tulo ka sagunsonnga tres aron silyohan ang halandumon nga kadaogan sa UV.
Nahimong triple ang selebrasyon ni Urdaneta kay naapil sab siya sa Mythical 5 kauban ang teammate niyang si Gabrielle Manlucot, Ryle Subeta sa CEC Dragons, Vince Ibarita sa University of San Carlos (USC) Baby Warriors, ug Francel Flores sa Benedicto College (BC) Baby Cheetahs.
Sa dihang nagtabla ang iskor, 44-44, sa pinal nga 16 segundos sa regulasyon, duna untay tsansa ang Dragons nga modaog apan nasipyat ang krusyal nga itsa ni Subeta.
Sa dihang nakigbisog ang CEC kay wala ang naangol nilang star guard nga si Dwayne Cañete sa lugway nga oras, ang Baby Lancers misutoy ngadto sa bulawanong kalamposan, salamat sa mainit nga mga kamot ni Urdaneta nga maoy nakasalbar kanila.
"Ang nakapa-champion gyud namo ang UV mentality nga dili mosugot magpapilde. Grabe ang fighting spirit ug dako kaayo og heart ang mga bata. Tanan credit para nila. Proud of my boys nga wala gyud sila ni give up until the end," matud pa ni UV head coach Ronald Bucao.
"Mapasalamaton ko sa whole UV community sa ilang makanunayong suporta. Sa tanan parents, sa among athletic director sir Cris Mejarito, ug sa UV management especially boss kons Digul Gullas, Mayor Samsam and to the Gullas family," dugang pa ni Bucao. "Daghan sab kaayong salamat sa akong pamilya sa pagsabot, sa akong fellow coaches sa pag-share sa inyong ideas ug sa akong mentor coach Jun Pepito sa suporta. Para ato ning tanan nga kalamposan."
- Latest
