Lancers, Webmasters managlahi ang misyon

Ikatulo nilang sangka CESAFI Finals mo-arangkada na

CEBU, Philippines — Sa ikatulo nilang sunod-sunod nga panag-abot sa Finals, managlahi nga misyon ang sagubangon sa University of the Visayas (UV) Green Lancers ug University of Cebu (UC) Webmasters sa dihang ang ilang best-of-three series sa Cebu Schools Athletic Foundation, Inc. (CESAFI) Season 24 basketball tournament mosikad na karong adlawa (Huybes, Disiembre 5) diha sa Cebu Coliseum.

Magsugod ang seguradong mainit ug eksplosibo nilang sangka  sa alas-6 sa gabii.

Ang Lancers naglaraw sa ikaduha nilang Grand Slam ubos sa paggiya ni Gary Cortes, nga anaa karon sa ikawalo niyang sagunson nga pagtikang sa Finals sukad siya gibira nga coach sa UV niadtong 2015.

Ning dalaygon niyang ratsada, si Cortes mitimon sa Lancers ngadto sa lima ka kampiyonato, apil na ang talagsaong 3-peat gikan niadtong 2016 ngadto sa 2018.

Karon, buot sa Lancers nga moangkon og usab sa maong dungog apan si Cortes nasayud nga malisud nga hagit ang ilang sagubangon batok sa way pildeng Webmasters nga maoy mitunol sa una ug bugtong pa lamang nilang pilde ning season.

"Playing against the undefeated UC is more challenging and enjoyable," matud pa ni Cortes. "We will just do our very best to achieve our goal of a 3-peat repeat." Sa habig sa UC, si coach Kernn Sesante mosuway na sab pagbisbis sa 13 ka tuig nilang huwaw sa titulo human mapakyas sud sa duha ka higayon batok sa Lancers.

Ang Webmasters, nga gipangulohan kanhi ni June Mar Fajardo, katapusang nakampiyon naidto pang 2011.

Nadasig sa ilang kalamposan sa eliminasyon diin sila mikumpleto og 8-0 sweep nga ilang gisundan sa pagpalagpot sa University of San Jose-Recoletos (USJ-R) Jaguars sa Final Four,  ang Webmasters andam  nga mobuhat sa tanan kutob sa ilang mahimo aron makab-ot ang ilang gihandum ning higayona.

"First of all, I am very grateful for the blessing of competing in the Finals for the third consecutive time. Sweeping the games in the eliminations and the semis was no easy task. The boys really worked hard and sacrificed a lot for it," dason pa ni Sesante.

"I expect the boys to be more composed than last year. So far, they have shown composure during two very close games against UP (eliminations) and USJ-R (semis). With that, I believe we have better chances of finally overcoming UV this time," dugang pa ni Sesante.