Davis, James miagak sa Lakers vs Spurs

CEBU, Philippines — Si Anthony Davis mihipos og 19 puntos ug 14 ka rebounds samtang si LeBron James mireshitro og triple-double uban ang 16 puntos, 11 ka assists ug 10 ka rebounds sa dihang gipayaka sa Los Angeles Lakers ang San Antonio Spurs, 119-101, sa NBA kagahapon didto sa Frost Bank Center sa San Antonio, Texas.

Ang eksplosibong rookie nga si Dalton Knecht miposa og upat ka tres sa iyang 20 puntos aron tabangan ang Lakers pagpakgang sa tulo nila ka sagunson nga pilde.

Si Victor Wembanyama maoy nangu sa pilderong Spurs bitbit ang 20 puntos ug 10 ka rebounds.

Sila si Harrison Barnes ug Julian Champagnie nagkumbinar og 37 puntos apan way nahimo ka naputol ang upat ka sagunson nga daog sa Spurs.

Ang Lakers miabante og 15 puntos sa first half ug igo lamang nakapaduol ang Spurs ngadto sa otso puntos.

Si Austin Reaves milansang og 3-pointer atubangan ni Wembanyama dayong kapupos sa oras sa first half aron paghatag sa Lakers og 58-57 nga bentaha.

Si San Antonio guard Devin Vassell mitimbre og 14 puntos sa iyang pagbalik human nakapalta og lima ka duwa kay nabun-og ang wala niyang tuhod.