Clippers mibihag sa Warriors

CEBU, Philippines — Si Norman Powell miposa og lima ka 3-pointers sa iyang 23 puntos aron pangulohan ang Los Angeles Clippers ngadto sa 102-99 nga pagpakurat sa inilog nga Golden State Warriors sa NBA kagahapon didto sa Intuit Dome sa LA, California.

Ang Clippers miabante og 15 puntos sa naghinapos nga bahin sa first half apan ang Warriors migukod ngadto na lang sa tres puntos padung sa katapusang kuwarter,

Sikit na ang kumbati sa duha ka puwersa sukad niadto hangtud sa hilimatyong segundos sa kulbahinam nga aksiyon.

Duna pa untay tsansa nga maka-overtime ang Warriors apan nasipyat ang gitira nga tres ni Gary Payton II dayong kapupos sa oras.

Si Stephen Curry maoy nangu sa Warriors uban ang 26 puntos samtang si Andrew Wiggins midugang og 22 puntos sa pilderong kawsa.

Sa laing bahin, si Damian Lillard mikuha og atensiyon sa iyang pagbalik gikan sa tulo ka duwa nga pahuway human siya mipasud sa krusyal niyang layup sa pinal nga 3.9 segundos aron aswaton ang Milwaukee Bucks ngadto sa makapaisa'g balahibo nga kadaogan batok sa Houston Rockets, 101-100.

Si Lillard mitapos bitbit ang 18 puntos ug 10 ka assists.

Sa ubang mga duwa, si Franz Wagner mibubo og 32 puntos aron tabangan ang Orlando Magic pagpasaop sa Phoenix Suns, 109-99,  samtang si Jimmmy Butler miharos og 30 puntos, 10 ka rebounds ug lima ka assists sa dihang gitiwasan sa Miami Heat ang nagkagidlay nga Philadelphia 76ers, 106-89.