Fighting Maroons nanamilit nga madaogon sa CESAFI basketball

USJ-R Baby Jaguars top seed sa Final Four

CEBU, Philippines — Ang University of the Philippines (UP) Cebu Fighting Maroons mibuntog sa University of San Carlos (USC) Warriors, 63-54, aron pagpanamilit nga madaogon sa Cebu Schools Athletic Foundation, Inc. (CESAFI) Season 24 men's basketball tournament niadtong Sabado, Nobiembre 16, didto sa Cebu Coliseum.

Nahagba ang Fighting Maroons sud sa unom ka sagunson nga higayon sukad giablihan ang ilang kampanya pinaagi sa 74-64 nga pagpakaging sa Cebu Institute of Technology-University (CIT-U) Wildcats niadtong Septiembre 26. Apan ang mga batos ni coach Rommel Rasmo mipakgang sa ilang malas uban sa nuybe puntos nilang pagpayaka sa Warriors aron pagbabay sa torneyo bitbit ang 2-6 win-loss record nga nakahatag kanila og garbo kay dili sila maoy nangiwit ning siyam ka koponan nga kompetisyon.

Si team captain Matthew Flores maoy nangu sa Fighting Maroons uban ang double-double nga 19 puntos ug 11 ka rebounds nga iyang gipalamanan og duha ka assists ug duha sab ka steals.

Si JZ Dizon miamot og 10 puntos, siyam ka rebounds ug tulo ka assists.

Mihipos si James Gica og 13 puntos, 11 ka rebounds, usa ka assist ug tulo ka steals alang sa Warriors, nga nakatilaw sa ikapito nilang pilde sud sa pito ka duwa. Sa juniors division, ang University of San Jose-Recoletos (USJ-R) Baby Jaguars mikulata sa Cebu Roosevelt Memorial Colleges (CRMC) Baby Mustangs, 88-34, aron angkonon ang numbero unong puwesto sa Final Four uban ang 10-1 nga baraha.

Si Jan Vince Oringo miharos og 18 puntos, 11 ka rebounds, tulo ka assists, tulo ka steals ug duha ka blocks, si Jan Francis Petilos midugang o 14 puntos ug pito ka rebounds samtang sila si Clark Benedick Candia ug Shaun Keizer Grava nagkumboya'g 21 puntos alang sa Baby Jaguars, nga magabaton og twice-to-beat advantage sa semifinals batok sa University of Cebu (UC) Baby Webmasters o sa Cebu Eastern College (CEC) Blue Dragons.

Sa laing bahin, ang two-time defending champion Sacred Heart School-Ateneo de Cebu (SHS-AdC) Magis Eagles mipalig-on sa ilang tinguha nga sakmiton ang No.2 spot ug twice-to-beat nga insentibo sa semis uban ang 68-59 nilang pagpakaging sa UC Baby Webmasters.

Si Froilan Maglasang mipaulbo og 24 puntos, lima ka rebounds, tulo ka assists ug tulo ka steals, samtang si Coriantumr Cabantog miamot og 16 puntos, unom ka rebounds ug usa ka assist alang sa Magis Eagles, nga usa na lang ka daog ang gikanahanglan aron kab-oton ang ilang target bitbit ang 8-1 nga marka.

Sa laing resulta, sila si Wade Adam Luche, Felix Jamel Ragasajo ug Rafael Calo nagkumbinar og 43 puntos aron ituboy ang University of Cebu Lapu-Lapu and Mandaue (UCLM) ngadto sa 85-46 nga paglampaso sa USC Baby Warriors.

Ang UCLM nanamilit uban ang 5-6 nga baraha samtang ang Baby Warriors natagak sa 2-8 padung sa katapusang nilang duwa.