Davis, LeBron mibida na sab sa Lakers

CEBU, Philippines — Si Anthony Davis mikadlit og 31 puntos ug 14 ka rebounds samtang si LeBron James midugang og 21 puntos aron pangulohan ang Los Angeles Lakers ngadto sa 104-99 nga pagpiog sa New Orleans Pelicans sa NBA kagahapon didto sa Smoothie King Center sa New Orleans, Louisiana.

Ang Lakers, nga nakakuha sab og 27 puntos gikan sa rookie nilang si Dalton Knecht, miinat sa mainit nilang ratsada ngadto sa lima ka duwa hinungdan nga naka-angkon sila og bahin sa ikatulong puwesto sa Western Conference uban ang 9-4 nga baraha.

Si James duna say pito ka rebounds ug lima ka assists apan wala na makarehistro og lima ka sagunson nga triple-double nga lain unyang rekord sa iyang karera.

Si Brandon Ingram mipatuasik og 32 puntos alang sa Pelicans nga nadagma didto sa ilang korte.

Didto sa Toronto, si Jayson Tatum milansang og layo kaayong 3-pointer dayong kapupos sa oras aron aswaton ang Boston Celtics ngadto sa 126-123 nga kadaogan sud sa overtime batok sa Raptors.

Si Jaylen Brown maoy nangu sa Celtics uban ang 27 puntos samtang si Tatum usa ka assists na lamang ang kuwang aron makaposte og triple-double uban ang 24 puntos, 11 ka rebounds ug siyam ka assists.

Ang Austrian nga sentong si Jakob Poeltl mipaulbo og career-high 35 puntos apan nakawang ang maanindot niyang salida sa Raptors.

Sa laing aksiyon, si LaMelo Ball mipupo og 26 puntos apil ang duha ka krusyal nga free throws sa pinal nga 7.1 segundos nga naghatag sa Charlotte Hornets og kulbahinam nga kadaogan batok sa Milwaukee Bucks, 115-114.

Duna pa untay tsansa ang Bucks nga usbon ang resulta pabor kanila apan si Giannis Antetokounmpo nasipyat sa iyang itsa sa nahibilin nga dos segundos.

Si Antetokounmpo mikolekta og 22 puntos, 15 ka rebounds ug 12 ka assists apan nakawang ang labing unya niyang triple-double ning season.

Sila si Taurean Prince ug Bobby Portis nagkumboya'g 44 puntos apan wala mosaler ang eksplosibo nilang salida kay natumba ang Bucks.

Sa laing makapaisa'g balahibo nga sangka, si De'Aaron Fox mipabuhagay og 49 puntos aron pangulohan ang Sacramento Kings ngadto sa 121-117 nga pagpaluhod sa bisita ilang Utah Jazz, 121-117.

Didto sa Dallas, sila si Kyrie Irving ug Daniel Gafford mi-iskor og 22 puntos matag usa samtang si Luka Doncic mitali og 16 puntos sa dihang gipayaka sa Mavericks ang San Antonio Spurs, 110-93, aron putlon ang upat ka sagunson nilang pilde.