LeBron mikulit og dugang kasaysayan; Cavs wala gihapoy pilde, 14-0 na

CEBU, Philippines — Si Anthony Davis mipaulbo og 40 puntos ug 12 ka rebounds samtang si LeBron James mihimo og dugang kasaysayan sa dihang gipaluhod sa Los Angeles Lakers ang San Antonio Spurs, 120-115, pagsugod nila pagdepensa sa ilang korona sa NBA Cup kagahapong adlawa didto sa Frost Bank Center sa San Antonio, Texas.

Ang 39-anyos nga si James mikadlit og triple-double sa ikaupat nga sunod-sunod nga higayon sa labing unang higayon sa 22 ka tuig niya sa NBA human siya mipupo og 15 puntos, 15 ka rebounds ug 12 ka assists sud sa 38 minutos niyang pagbabad sa korte.

Tungod niini, gitabla ni James ang rekord sa Lakers alang sa labing taas nga pagratsada og triple-double gawas nga nahimong labing tiguwang nga player sa kasaysayan sa NBA nga nakasagunson og upat ka triple-double.

Ang nakanindot kay daog tanan si James sa maong mga higayon,.

Ang Rookie of the Year sa miaging season nga si Victor Wembanyama maoy nangu sa pilderong Spurs bitbit ang 28 puntos ug 14 ka rebounds.

Sa laing bahin, ang Cleveland Cavaliers nagpabiling way pilde human gi-ihaw ang Chicago Bulls, 144-126.

Si Donovan Mitchell mipabuhagay og 37 puntos alang sa Cavs, nga nagkupot na karon og 14-0 nga baraha.

Ang Cavaliers iukaunom pa lamang nga team sa kasaysayan sa NBA nga miharos og daog sa nag-una nilang 14 ka duwa sa season.Ilang gitabla ang ikaupat nga labing nindot nga sinugdanan sa kasaysayan sa liga.

Sa laing aksiyon, si De'Aaron Fox mipabuto og 60 puntos apan nabaraw ang impresibo niyang salida human ang Sacramento Kings gipayaka sa Minnesota Timberwolves, 130-126, sa overtime.

Samtang si James Harden nakigduyog ni Ray Allen sa ikaduhang dapit alang sa labing daghan nga 3-pointers sa NBA uban ang 2,973 ka tres.

Apan wala mahingpit ang selebrasyon ni Harden gumikan kay kay ang LA Clippers gipakaging sa Houston Rockets, 125-104.

Sa uban pang mga resulta, si Shai Gilgeous-Alexander mi-iskor og 28 puntos aron ituboy ang Oklahoma City Thunder ngadto sa 99-83 nga pagbugha sa Phoenix Suns, 99-83, si Brandon Ingram mitali og 29 puntos sa dihang ang New Orleans mibihag sa Denver Nuggets, 101-94, aron putlon ang unom ka sunod-sunod nilang malas, samtang si Buddy Hield mihipos og 18 puntos aron pangulohan ang balanseng ataki sa Golden State Warriors nga naghatud kanila ngadto sa 123-118 nga kadaogan batok sa Memphis Grizzlies.

Wala sad magpabitin ang Atlanta Hawks nga midagit sa Washington Wizards, 129-117, ingon man ang Orlando Magic nga mipaksit sa Philadelphia 76ers, 98-86. Didto sa New York, si Jalen Brunson milansang og tres sa nahibilin nga sayes segundos aron aswaton ang Knicks ngadto sa makutas nga daog, 124-122, batok sa Brooklyn Nets.