Dunk ni Collins misalbar sa Jazz

CEBU, Philippines — Si John Collins mihansak sa game-winning dunk sa nahibilin ng sayes segundos sa dihang gipatilaw sa Utah Jazz ang Dallas Mavericks sa ikaupat niining sagunson nga kapildihan.

Ang Mavericks, nga nakahiagum og makabuak sa dughan nga kaparotan sa miagi nilang mga duwa, natiwasan ang kalabaryo human sila gipiog sa Jazz, 115-113, sa kulbahinam nilang kumbati kagahapon didto sa Delta Center sa Salt Lake City, Utah.

Si Collins maoy nangu sa Jazz uban ang 28 puntos, 13 niini iyang gibubo sa ikatulong kuwarter diin gilabhan sa Utah ang bisitang Dallas, 38-21, aron pag-abante og 16 puntos sa usa ka higayon.

Apan ang Mavs, nga gigatongan og 37 puntos ni Luka Doncic, miresbak sa katapusang kuwarter hinungdan nga na-ilog nila ang labaw, 110-108, sa pinal nga dos minutos.

Si Collins naka-iskor pinaagi sa usa ka tip-in dunk aron pagpalabaw og balik sa Jazz og tres puntos, 113-110, sa nahibiling 37 puntos apan si Klay Thompson miposa og 3-pointer aron tablahon ang iskor, 113-113.

Nagdanga-danga na unta ang duha ka kampo ngadto sa overrtime apan si Jordan Clarkson nakakita og lugak sa depensa sa Dallas dayong pasa sa bola ngadto ni Collins, nga mihansak sab dayon sa bola aton tabangan ang Jazz pag-inat sa ilang rekord ngadto sa 3-8.

Ang Fil-Am nga si Clarkson mitampo og 20 puntos samtang si Colin Sexton midonar og 16 puntos alang sa Jazz.

Si Thompson milansang og lima ka tres sa iyang 17 puntos apan naminghoy sa gihapon tungod kay ang Mavs natagak sa 5-7.