CEBU, Philippines — Gitiwasan sa University of Southern Philippines Foundation (USPF) Panthers ang kalbaryo sa University of the Philippines (UP) Cebu human ilang gilat-an ang Fighting Maroons, 75-48, sa Cebu Schools Athletic Foundation, Inc. (CESAFI) Season 24 men's basketball tournament niadtong Miyerkules sa gabii, Nobiyembre 13, didto sa Cebu Coliseum.
Si Peter John Peteros mipasud og 10 sa 17 niya ka itsa apil na ang duha ka 3-pointers dayon na ngadto sa pagkadlit og 22 puntos nga iyang gisukipan og siyam ka rebounds, usa ka assist ug duha ka two steals sa dihang ang Panthers milansang sa ikatulo nilang daog sa pito ka duwa.
Wala nay lang USPF player nga mireshitro og double figures apan ang Panthers migamit og balanseng ataki aron dominahon ang Fighting Maroons.
Mangtas kaayo ang Panthers nga sa usa ka higayon miabante og 30 puntos, 71-41, sa naghinapos nga bahin sa 40 minutos nga aksoiyon.
Bugnaw kaayo ang opensa sa UP Cebu diin ang ilang mga topscorers nga sila si JZ Dizon ug AJ de los Reyes mi-iskor lamang og sayes puntos nga miresulta sa pagkasukarap sa Fighting Maroons sa ikaunom nga sunod-sunod nga higayon sukad sa madaogon nilang sinugdanan.
Sa high school division, ang Cebu Institute of Technology-University (CIT-U) Baby Wildcats mihuyop og kinabuhi sa nagka-awop nilang paglaum nga makatikang sa Final Four human sila nakaipsot sa USPF Baby Panthers, 53-50.
Si Cyrus Joeff Abadies mihipos og 10 puntos, tulo ka rebounds ug usa ka steal samtang sila si Kent Noguerra, Kieff Russel Suarez ug Christian Joseph Bustillo nagkumboya'g 26 puntos, 17 ka rebounds, 12 ka steals ug tulo ka assists alang sa Baby Wildcats, nga buhi pa sa sikit kaayong karera sa semifinals bitbit ang 6-4 nga baraha.
Ang Baby Panthers natagak sa 4-5 ug wala nay paglaum nga makasud sa semis.