1st Shine Cebu 4th District Basketball Cup kasado na

CEBU, Philippines — Andam na ang tanan alang sa labing unang Shine Cebu 4th District U30 Basketball Cup nga gikatakdang mosikad sunod bulan.

Adunay duha ka seremonyas sa pagbukas nga gihan-ay alang ning inter-town nga torneyo alang niadtong mga basketbolista nga nag-edad og 30 anyos paubos - Disiembre 6 alang sa island division didto sa isla sa Bantayan Island ug Disiembre 7 alang sa mainland category didto sa Don Celestino Martinez Memorial Sports Complexsa dakbayan sa Bogo.   

Magkumbati sa island bracket ang Madridejos, Bantayan ug Santa Fe. Moduwa sila og double round robin sa eliminasyon diin ang Top 2 maoy mag-ilog sa titulo.

Sa mainland group, magpinaksitay ang Daanbantayan, Bogo City, San Remigio, Tabuelan, Medellin, ug Tabogon.

Magsangka sila ubos sa single round robin format. Ang Top 4 qualifiers mo-abante sa crossover semifinals, diin ang mga mananaog maoy magtige sa kampiyonato.

Ang nag-unang mananaog sa island ug mainland magbangga dayon alang sa overall crown.

Ang Top 3 sa island ug mainland mobulsa og P50,000, P30,000 ug P20,000. Adunay P50,000 nga dugang ganti alang sa overall champion ug P30,000 sa first runner-up.

Hugtanong gipaluyohan ni Daanbantayan Mayor Sun Shimura, ang liga ubos sa superbisyon ni commissioner Marc Malazarte inabagan ni deputy commissioner Serg Alburo.