Magis Eagles nakaipsot sa Baby Wildcats

CEBU, Philippines — Ang Sacred Heart School-Ateneo de Cebu (SHS-AdC) Magis Eagles mi-eskapo ngadto sa 71-67 nga kadaogan batok sa Cebu Institute of Technology-University (CIT-U) Baby Wildcats aron palig-onon ang ilang kampanya nga maka-angkon og luna sa Top 2 nga dunay twice-to-beat advantage sa Final Four sa Cebu Schools Athletic Foundation, Inc. (CESAFI) Season 24 basketball tournament niadtong Sabado, Nobiembre 9, didto sa Cebu Coliseum.

Ang Magis Eagles nagdanga-danga unta sa makapadismaya nga kapildihan human siya naalkansi og singko puntos, 62-67, sa pinal nga dos minutos. Apan ang Magis Eagles mipakita sa kasingkasing nga naghimo kanilang back-to-back champions pinaagi sa pagtak-op sa duwa uban ang eksplosibong 9-0 rally aron patikangkangon ang Baby Wildcats.

Si Lian Kent Basa misidlak nga labing hayag sa kampo sa Magis Eagles bitbit ang 20 puntos, unom ka rebounds, upat ka assists ug usa ka block.

Impresibo sab si Rodolfo Froilan Maglasang nga mihipos og 16 puntos, lima ka rebounds, lima ka assists ug duha ka steals alang sa Magis Eagles, nga nakigduyog sa University of San Jose-Recoletos (USJ-R) Baby Jaguars sa kinatas-ang dapit sa juniors division standings uban ang managsamang 7-1 nga baraha.

Si Kieff Russel Suarez mipabuto og 23 puntos, duha ka rebounds ug tulo ka assists samtang si Christian Joseph Bustillo midugang og 10 puntos, pito ka rebounds, upat ka assists ug duha ka steals apan wala sila nahimo gumikan kay ang Baby Wildcats natagak sa 5-4 human wala makab-ot ang krusyal nga daog nga makapahayag unta sa ilang tsansa nga makatikang sa semifinals.