Lancers mipatilaw og pilde sa Cheetahs

Mga duwa karon (Cebu Coliseum)

CEBU, Philippines — Ang University of the Visayas Green Lancers mitunol sa Benedicto College sa una niining pilde apan ang  two-time defending champion mikumbati usa og maayo sa endgame sa wala pa tumbaha ang Cheetahs, 71-68, sa Cebu Schools Athletic Foundation, Inc. (CESAFI) Season 24 basketball tournament niadtong Huwebes, Nobiyembre 7, didto sa Cebu Coliseum.

Bugnaw ang sinugdanan sa Lancers hinungdan nga naalkansi sila og dos puntos, 12-14, human sa nag-unang 10 minutos sa aksiyon, apan milusad sila og nagkayong 30-19 rally sa ikaduhang kuwater aron pagposte og 42-33 nga bentaha sa halftime.

Giinat pa sa Lancers ang ilang labaw ngadto sa 69-59 sa tunga-tungang bahin sa katapusang kuwarter ug dayon nakasugakod sa madasigong kumbati sa Cheetahs sa naghinapos nga bahin sa duwa aron pag-eskapo ngadto sa tres puntos nga kadaogan.

Si Raul Gentallan maoy nangu sa Lancers bitbit ang 20 puntos, tulo ka rebounds, ug tulo ka assists.

Si Froiland Maglasang mikadlit og 17 puntos, samtang si Ivan Clark Alsola midugang og 15 puntos human nakapasud og pito sa siyam niya ka itsa sa dihang ang Lancers milayat sa ikaduhang puwesto sa college division standings uban ang 6-1 rekord.

Si Junil Bulan mihipos og 15 puntos ug pito ka rebounds, samtang si Denrick Orgong mitali og 11 puntos, tulo ka rebounds ug tulo ka assists apan nakawang ang ilang paningkamot gumikan kay naputol ang upat ka sagunson nga daog sa Cheetahs.

Sa high school level, ang Baby Lancers way kaluoy nga miihaw sa Don Bosco Technical College (DBTC)-Cebu Greywolves, 127-70.

Si Roderick Cambarijan, Jr. miharos og 23 putnos ug pito ka rebounds samtang si Christophelcian Abellana mipupo og 21 puntos aron pangulohan ang Baby Lancers ngadto sa 57 puntos nga pagmasaker sa Greywolves.

Si John Nathan de la Torre hapit morehistro og makasaysayanong quadruple-double uban ang 13 puntos, 11 ka rebounds, pito ka assists ug walo ka steals, samtang si Jhunnel Dagatan midonar og 12 puntos, upat ka rebounds ug tulo ka assists sa dihang gipalig-on sa Baby Lancers ang ilang tsansa nga makasud sa Final Four uban ang 6-2 nga baraha.

Si Carmelson Paul Abangan mibulsa og 18 puntos ug pito ka rebounds, si Angelo de la Cruz mi-iskor og 15, samtang si Jasheed Cyril Ybarra mikimada og 11 puntos, upat ka rebounds, duha ka assists ug duha ka steals apan way nahimo gumikan kay ang Greywolves nahagba sa ikaunom nga higayon sa walo ka duwa.