Mavs milampaso sa Magic

CEBU, Philippines — Si Luka Doncic mikadlit og 14 sa iyang 32 puntos sa unang kuwarter aron pangulohan ang Dallas Mavericks ngadto sa 108-85 nga demolisyon sa Orlando Magic sa NBA kagahapon didto sa American Airlines Center sa Dallas, Texas.

Luyo sa sayong pagpanginit ni Doncic nga milangkat sab og siyam ka rebounds ug mipasa og pito ka assists, wala na molingi pa ang Mavs sukad sila miposte og 30-22 nga bentaha human sa unang kuwarter.

Misamot pa ang kamangtas sa Mavs aron pagburoton ang ilang labaw ngadto sa 33 puntos.

Dako sab og natampo sila si Daniel Gafford ug Kyrie Irving nga nagkumbinar og 35 puntos alang sa Mavs.

Si Franz Wagner maoy nangu sa pilderong Magic uban ang 13 puntos, unom ka rebounds ug unom ka assists.

Sa laing bahin, ang Detroit Pistons dali nga namawi gikan sa 30 puntos nilang kapildihan ngadto sa New York Knicks ug gipahimungtan sa ilang kapungot ang New Jersey Nets, 106-92, alang sa ikaduha pa lamang nilang daog ning season.

Si Cade Cunningham mihipos og 19 puntos, unom ka rebounds ug lima ka assists alang sa Pistons.

Nakakuha siya og dakong suporta gikan nilang Tobias Harris ug Malik Beasley nga mipupo og 18 puntos matag usa.

Didto sa New Orleans, si Jalen Johnson mipabuto og 29 puntos samtang si Trae Young midugang og 23 puntos, upat ka rebounds, 12 ka assists ug usa ka steal sa dihang gidagit sa Atlanta Hawks ang Pelicans, 126-111.