Celtics, Lakers 3-0 na

CEBU, Philippines — Ang defending champion Boston Celtics ug ang Los Angeles Lakers milansang sa ikatulo nilang sagunson nga daog ning lab-as nga NBA season.

Si Jayson Tatum mipabuhagay og 37 puntos samtang si Jaylen Brown midugang og 24 puntos aron ituboy ang Celtics ngadto sa 124-118 nga pagpakaging sa Detroit Pistons.

Naglabaw unta ang Pistons og sayes puntos, 112-106, sa pinal nga singko minutos apan ang Celtics  misira sa duwa pinaagi sa nagkayong 18-6 rally aron inaton ang perpekto nilang baraha ngadto sa 3-0.

Sa laing aksiyon, sila si LeBron James ug Anthony Davis nagkumboya'g 63 puntos, 30 niini ilang gibubo sa katapusang kuwarter, sa dihang ang Lakers nakaipsot sa Sacramento Kings, 131-127.

Si James mikolekta og triple-double uban ang 32 puntos, 14 ka rebounds ug 10 ka assists, samtang si Davis mibomba og 31 puntos, siyam ka rebounds, tulo ka steals ug duha ka blocks.

Si Domantas Sabonis mipupo og 29 puntos, 12 ka rebounds ug 10 ka assists alang sa Kings. Si De'Aaron Fox mihipos og 28 puntos ug 10 ka assists samtang si DeMar DeRozan mitali og 23 puntos sa pilderong kawsa.

Midaog sab og Los Angeles Clippers batok sa Denver Nuggets, 109-104, luyo sa pagkamabayanihon ni Norman Powell nga mitagak og 22 sa iyang 37 puntos sa katapusang kuwarter.

Wala sab magpabitin si James Harden nga miharos og 23 puntos ug 16 ka assists ingon man si Ivica Zubac nga midugang og 24 puntos ug 15 ka rebounds alang sa Clippers.

Si Nikola Jokic miposa og pito ka 3-pointers dayon na ngadto sa pagrehistro og 41 puntos apan nakawang ang eksplosibo niyang salida gumikan kay ang Nuggets napukan sa ikaduhang higayon.

Didto sa Phoenix, si Kevin Durant mipabuto og 31 puntos aron pangulohan ang Suns ngadto sa 114-102 nga pagpayaka sa Dallas Mavericks.

Ang Phoenix nakasugakod sa mainit nga performance ni Luka Doncic nga mirapido og 40 puntos ug milangkat og 10 ka rebounds alang sa Mavs.

Sa laing resulta, si Victor Wembanyama miposte og 29 puntos aron aswaton ang San Antonio Spurs ngadto sa 109-106 nga pag-ugbok sa Houston Rockets.