Thunder mikulata sa Nuggets; Thompson mihimo'g impresyon sa iyang Mavs debut

CEBU, Philippines — Sila si Shai Gilgeous-Alexander ug Chet Holmgren mikuha og atensiyon sa dihang giablihan sa Oklahoma City Thunder ang ilang kampanya ning lab-as nga NBA season pinaagi sa usa ka dominanteng 102-87 nga kadaogan  batok sa Denver Nuggets kagahapong adlawa didto sa Ball Arena sa Denver, Colorado.

Si Gilgeous-Alexander, nga maoy runner-up ni Nikola Jokic sa Nuggets sa karera pagka-MVP sa miaging season, miharos og 28 puntos, samtang si Holmgren midugang og 25 puntos, career-high nga 14 rebounds, upat ka blocks ug duha ka steals alang sa Thunder nga sa usa ka higayon naglabaw og 20 puntos. Ang three-time MVP nga si Jokic mirehistro og triple-double nga 16 puntos, 12 ka rebounds ug 13 ka assists apan nakawang ang iyang paningkamot sa habig sa Nuggets.

Sa laing bahin, si four-time NBA champion Klay Thompson misidlak sa iyang debut uban sa Dallas Mavericks.

Ang kanhi batos sa Golden State Warriors mikadlit og 22 puntos aron tabangan ang reigning Western Conference champion Mavericks nga pakagingon ang San Antonio Spurs, 120-109.

Wala sab magpabitin si Luka Doncic nga mipabuhagay og 28 puntos ug 10 ka rebounds alang sa Mavs.

Ang Rookie of the Year sa miaging season nga si Victor Wembanyama mihipos og 17 puntos apan mipasud lamang og lima lsa 18 niya ka itsa.

Ang beterano nga nadugang sa ilang puwersa nga si Chris Paul tres puntos lang ang nahimo uban ang walo ka assists.

Sa laing resulta, ang defending champion Boston Celtics nakabawi gikan sa mabugnaw nga sinugdanan aron patikalbongon  ang Washington Wizards, 122-102. Si Jaylen Brown nagselebrar sa ika-28 nga sumad sa adlaw niyang natawhan pinaagi sa pagbubo og 28 puntos.

Si Jayson Tatum mipupo og 25 puntos ug 11 k rebounds samtang si Derrick White midonar og 19 puntos alang sa ikaduhng sagunson nga daog sa Celtics.