Finals rematch ng GSM at TNT magiging madugo -- Cone

MANILA, Philippines — Kung tinapos ng TNT Tropang Giga ang Barangay Ginebra sa Game Six noong nakaraang Season 48 PBA Governors’ Cup Finals, posibleng umabot sa Game Seven ang kanilang finals rematch ngayon.

Ayon kay coach Tim Cone ng Gin Kings, sobra-sobrang hirap ang kanilang pinagdaanan para muling makapasok sa best-of-se­ven championship series.

At hindi sila papayag na muling talunin ng Tropang Giga sa pagkakataong ito.

“We worked so hard to be at this point and now it’s almost a do-or-die and it’s gonna be really disap­pointing for us as an orga­nization if we don’t win this but if we do we will be really ecstatic,” wika ni Cone kahapon sa PBA Fi­nals press conference sa Atrium sa Enderun College sa Taguig City.

Nakatakda ang Game One sa Linggo sa Ynares Center sa Antipolo City.

Sinibak ng TNT ang Rain or Shine, 4-1, habang pi­natalsik ng Ginebra ang San Miguel, 4-2, sa kani-ka­nilang best-of-seven se­mifinals showdown.

“I think in the end, magkakatalo iyon how the pla­yers execute and how the teams are able exert their own style of play,” wika ni Tro­pang Giga mentor Chot Reyes.

Muli ring magtutuos sina imports Justin Brownlee ng Ginebra at Rondae Hollis-Jefferson ng TNT sa ikalawa nilang sunod na PBA Finals matchup.

Samantala, inihayag nina PBA chairman Ricky Var­gas at vice chairman Alfrancis Chua na ang lahat ng mabebentang tiket sa Game One ay kanilang ibi­­bigay sa mga biktima ng bag­yong ‘Kristine.

“Nag-usap kami ni Com­missioner (Willie Marcial), chairman (Vargas), we decided ‘yung Sunday’s game, ‘yung proceeds no’n lahat ido-donate namin. Lahat ‘yon,” sabi ni Chua.

Patuloy ang panana­la­sa ng bagyong ‘Kristine’.