UV Lancers 4-0 na

CEBU, Philippines — Ang University of the Visayas (UV) Green Lancers yanong mikastigo sa Cebu Roosevelt Memorial Colleges (CRMC) Mustangs, 84-53, aron pagpabiling way pilde sa Cebu Schools Athletic Foundation, Inc. (CESAFI) Season 24 basketball tournament niadtong Martes sa gabii, Oktubre 22, didto sa Cebu Coliseum.

Si Zylle Cabellon mihipos og 13 puntos, duha ka rebounds, usa ka assist ug usa ka steal samtang si Brian Fichter Jr. midugang og 10 puntos, duha ka rebounds ug tulo ka steals sa dihang ang Lancers naka-angkon og bahin sa liderato sa college division uban sa University of Cebu (UC) Webmasters bitbit ang managsamang 4-0 nga baraha.

Ang reigning MVP nga si Kent Ivo Salarda mi-iskor lamang og sayes puntos apan mangtas sa depensa diin siya milangkat og 14 ka rebounds alang sa Lancers, nga nagkayo ang opensa gikan sa pagsugod ug miabante og 32 puntos, 81-49, sa usa ka higayon.

Si Earl Laniton mipabuhagay og 21 puntos, unom ka rebounds, usa ka assist ug lima ka steals samtang si Keaton Clyde Taburnal mitali og 14 puntos, unom ka rebounds ug duha ka steals apan pareho silang naminghoy kay ang Mustangs natagak sa 1-3. Sa high school level, ang Cebu Institute of Technology-University (CIT-U) Baby Wildcats milusad og mainit nga ataki sa second half aron ilampaso ang CRMC Baby Mustangs, 72-53.

Si Randel Mendaros mikolekta og double-double nga 13 puntos ug 12 ka rebounds samtang si Kieff Russell Suarez mitampo og 10 puntos ug upat ka steals alang sa Baby Wildcats, nga mikatkat sa ikaunom nga puwesto sa juniors standings uban ang 4-2 win-loss record.

Human sa 33-33 nga panagtabla sa halftime, ang Baby Wildcats mipasiugda og mainit nga 22-11 rally sa ikatulong kuwarter ug dayon nakasusinir sa ilang ratsada sa katapusang bahin sa duwa aron pagposte og 19 puntos nga demolisyon batok sa Baby Mustangs.

Sa kinatibuk-an sa final half, gilabhan sa Baby Wildcats ang Baby Mustangs, 39-20.

Si Brent Teshawn Cuyno mikadlit og 15 puntos, upat ka rebounds, duha ka assists ug upat ka steals samtang si Erick Estalani adunay 11 puntos, duha ka rebounds ug upat ka steals apan way nahimo kay ang Baby Mustangs nakatilaw sa ikalima nilang pilde sa unom ka duwa.