UC Webmasters 4-0 na sa CESAFI

Karera sa Final Four sa juniors division nagkainit

CEBU, Philippines — Ang University of Cebu (UC) Webmasters miligid sa ikaupat nilang sagunson nga daog human gipayaka ang University of San Carlos (USC) Warriors, 57-46, sa Cebu Schools Athletic Foundation, Inc. Season 24 basketball tournament niadtong Domingo, Oktubre 20, didto sa Cebu Coliseum.

Way nakatali og double-digit sa kampo sa Webmasters apan bisan pa man niini napalig-on nila ang ilang posisyon sa kinatas-ang dapit sa college leaderboard uban ang perpektong 4-0 rekord.

Kontrolado kaayo sa Webmasters ang dagan sa duwa sukad sila misutoy ngadto sa sayong 23-8 nga labaw, nga ila pang giinat ngadto sa 22 puntos, 49-27, sa sayong bahin sa katapusang kuwarter.

Si James Paolo Gica mihipos og 12 puntos ug pito ka rebounds alang sa Warriors nga natagak sa 1-5.

Sa high school level, ang two-time defending champion Sacred Heart School-Ateneo de Cebu (SHS-AdC) Magis Eagles ug University of San Jose-Recoletos (USJ-R) Baby Jaguars parehong mikadlit sa ikalima nilang daog.

Si Coriantumr Cabantog mipabuto og 20 puntos ug walo ka rebounds samtang si Froilan Maglasang midugang og 11 puntos sa dihang ang Magis Eagles madasigong mipapas sa 14 puntos nilang alkansi sa first half dayon na ngadto sa pagpabugnaw sa Cebu Eastern College (CEC) Dragons, 74-60.

Sa laing bahin, sila si Kyle Mathew Barrieta ug Shaun Keizer Grava miposte og 11 puntos matag usa samtang nagkumbinar og 12 ka rebounds, lima ka assists ug upat ka steals aron ituboy ang Baby Jauars ngadto sa 61-52 nga pagpayaka sa University of Southern Philippines Foundation (USPF) Baby Panthers.

Tungod niini, ang Magis Eagles ug Baby Jaguars mipuwersa og four-way tie uban sa University of the Visayas (UV) Baby Lancers ug UC Baby Webmasters sa liderato sa juniors division bitbit ang managsamang 5-1 rekords nga nakapasikit og maayo sa karera alang sa Final Four kay ang 5-2 nga CEC Dragons usa man lang ka tikang ang gintang kanila.