Pulpogan milangkat sa SK title sa 14th Alegado Cup

CEBU, Philippines — Ang Pulpogan nagsandig sa eksplosibo nilang opensiba sa katapusang kuwarter aron i-sweep ang Cabangahan sa ilang best-of-three finals uban ang 68-62 nga kadaogan sa Game 2 ug sakmiton ang titulo sa kampiyonato sa SK division sa 14th Mayor Teresa "Nene" P. Alegado Cup Fiesta Basketball League didto sa Consolacion, Cebu.

Si CJ Mission maoy nangu sa Pulpogan bitbit ang 18 puntos. Nakakuha siya og dakong suporta gikan nilang Jovel Quinto ug Patrick Damayo nga nagkumbinar og 27 puntos.

Ang Pulpogan kanunay nga naggukod ug alkansi pa gihapon og otso puntos, 47-55, padung sa pinal nga 10 minutos sa aksiyon apan milusad og nagkayong 21-7 rally sa endgame aron patikangkangon ang Cabangahan.

Si Adrian Panangin mihipos og 13 puntos samtang sila si John Kevin Garcia ug Marvin Devilla mitali og 10 puntos matag usa apan nakawang ang ilang paningkamot sa habig sa Cabangahan.

Ang Pulpogan ubos sa paggiya ni head coach Ronald Somosot inabagan nilang Rexon Moneva ug Paulo Dalumpines, nga kasamtangang team captain sa Cebu Roosevelt Memorial Colleges (CRMC) Mustangs sa Cebu Schools Athletic Foundation, Inc. (CESAFI).