PBA semis kumbatihan na

CEBU, Philippines — Kasado na ang Final Four sa PBA Governors' Cup karong adlawa (Miyerkules, Oktubre 9) didto sa PhilSports Arena sa Pasig City.

Ang managsoong koponan nga San Miguel Beer ug Barangay Ginebra magsugod sa ilang best-of-seven semifinals sa alas-5 sa hapon samtang ang TNT Tropang Giga ug ang Rain or Shine Elasto Painters mosikad sa kaugalingon nilang serye sa alas 7:30 sa gabii.

Parehong anaa sa Group B, ang Beermen ug Gin Kings nag-abot sud sa duha na ka higayon sa eliminasyon.   

Ang Ginebra mipatigbabaw sa una nilang engkwentro pinaagi sa sikit nga desisyon, 108-102, apan ang San Miguel bangis nga nanimawos pinaagi sa 131-82 nga demolisyon sa ilang rematch.

Samtang ang Gin Kings nakapahuway og sakto human gi-sweep ang Meralco Bolts, 3-0, sa playoffs, ang Beermen nag-agi usa og makutas nga Game 5 sa wala pa tagaka ang Converge FiberXers aron pag-abante sa semis.

"Against Ginebra we just have to play well," said Gallent following the final game against the FiberXers," dason pa ni SMB coach Jorge Gallent.  "It's well-coached, it has great players so, you know, we just have to play well, we have to play our A-game, for us to have a chance to beat them."

Gipangulohan nilang EJ Anosike ug eight-time MVP June Mar Fajardo, ang Beermen makalaum sab nilang CJ Perez, Marcio Lassiter, Kris Rosales, Jericho Cruz, ug Mo Tautuaa sa ilang tinguha nga makatikang og balik sa kampiyonato.

Nagbarog sa ilang dalan ang eksplosibong import sa Ginebra nga si Justin Brownlee ug ang mga kasaligan niining local players nga naglangkob nilang Scottie Thompson, Stephen Holt, Japeth Aguilar, RJ Abarrientos, ug Maverick Ahanmisi.

Sa pikas bahin, ang Tropang Giga ug ang E-Painters magbugno sa unang higayon ning komperensiya kay napoundok man sila sa managlahing brackets.

Si RoS coach Yeng Guiao miangkon nga usa ka malisud nga hagit alang kanila ang pakigsangka sa TNT.

"We're playing a tough team and they're the defending champions," kanayon pa ni Guiao.

Gipaabot nga mo-agak sa E-Painters mao ang leading scorers nilang sila si Aaron Fuller, Jhonard Clarito ug Adrian Nocum.

Mohatag kanila og labad sa ulo mao ang nag-unang nga tirador sa TNT nga sila si Rondae Hollis-Jefferson, Calvin Oftana, RR Pogoy, ug Rey Nambatac.