Paraase, Casinillo nangu sa mga mananaog
CEBU, Philippines — Sila si Asia Paraase ug Jerome Casinillo maoy nangu sa mga mananaog sa Pink October Fun Run nga gipasiugdahan sa lungsod sa Moalboal pinaagi sa ilang Rural Health Unit agi'g pag-obserbar sa Breast Cancer Awareness Month niadtong Sabado, Oktubre 5.
Si Paraase milangkat sa korona sa women's 10K category sud sa oras nga 47 minutos ug 38 segundos. Si Cherry Andrin miangkon sa ikaduhang dapit sa oras nga 49:03 ug gisundan kini nilang Jeanny Mata (49:05), Patricia Pangagao (55:39), ug Melanie Bamba (61:39).
Sa men's 10K, si Casinillo ang misakmit sa titulo uban ang oras nga 35:22. Iyang gibiyaan og 64 segundos ni Jessie Abelgas nga maoy nalandig sa ikaduhang puwesto ug labaw siya og dul-an 90 segundos ni Leonard Kemboi nga mitapos ikatulo. Sila si John Vincent Gemparo (39:16) ug Sofronio Batiancha (42:24) ang mi-okupar sa ikaupat ug ikalimang puwesto.
Sa 5K, sila si Art Joy Torregosa ug Jovan Bensig ang nanghawod.
Si Torregosa maoy labing paspas sa women's division sa oras nga 20:11, labaw og 35 segundos ni Michelle Raniola. Sila si Ziah Aras (21:26), Jane Panglao (23:54), ug Joy Baldos (23:54) nahimutang sa ikatulo ngadto sa ikalimang dapit.
Sa men's side, si Bensig ang mibira sa unang dapit sa oras nga 16:04, labaw lamang og 17 segundos ni Oswaldo Arcelo. Sila si Clinto Nino Roma (17:05), Gerson Quevedo (17:06) ug Cristian Lopez (18:00) ang naglangkob sa top 5.
- Latest
