NBA Abu Dhabi games

CEBU, Philippines — Celtics giunhan ang Nuggets

Ang Boston Celtics mibuntog sa Denver Nuggets sa pasiunang aksiyon sa duha ka duwa nilang NBA Abu Dhabi Games atubangan sa bagang bul-og sa fans nga nagdasok didto sa Etihad Arena sa Abu Dhabi, United Arab Emirates.

Nabiyaan ang Celtics og 14 puntos apan madasigong mibangon aron patikalbongon ang Nuggets, 107-103.

Si Payton Pritchard milansang og unom ka 3-pointers aron pangulohan ang Celtics bitbit ang 20 puntos, samtang sila si Jayson Tatum, Jrue Holiday ug Derrick White nagkumboya'g 25 puntos.

Ang laing bitoon sa Celtics nga si Jaylen Brown miamot og otso puntos, duha ka rebounds ug duha ka assists.

Si Nikola Jokic mikadlit og 14 puntos alang sa Nuggets nga iyang gipalamanang og walo ka rebounds, duha ka assists, ug duha ka steals sud lamang sa 17 minutos.

Ang bag-o nilang batos nga si Russell Westbrook nagparamdam dayon sa Nuggets uban ang 12 puntos apil niini ang tulo ka tres ug walo ka assists.

Si Westbrook, kanhi MVP ug nine-time All-Star, mitapon sa Nuggets niadtong Hulyo human miduwa sa Los Angeles Clippers sa miaging season

Mihipos si Michael Porter Jr. og 12 puntos alang sa Nuggets apan si Jamal Murray nalimitahan ngadto lamang sa tres puntos.

Wala na hinoon paduwaa pa sa duha ka kampo ang ila mga starters sa second half.

Ang Celtics ug ang Nuggets magtiwas karong adlawa sa ikaduhang duwa sa ilang NBA pre-season games didto sa Abu Dhabi.-