Asilo andam na sa malisud nga misyon
CEBU, Philippines — Ang pambato sa PMI Bohol Stable nga si Gerwin “The Gladiator” Asilo mowadwad sa iyang abilidad sa langyaw'ng lapyahan sa labing unang higayon sa iyang karera.
Ug dili sayon nga tahas ang sagubangon ni Asilo sa dihang makig-atbang siya sa Hapon nga si Tenshin Nasukawa sud sa 10 ka hugna nga rambol alang sa bakanting World Boxing Organization (WBO) Asia Pacific bantamweight title karong Oktubre 14 didto sa Ariake Arena sa Tokyo, Japan.
Si Asilo, nga nagkupot og perpektong 9-0 rekord uban ang 4KOs, maoy bugtong Pinoy nga mopakita'g aksiyon sa makasaysayanong promosyon nga naglangkob og pito ka world championship bouts nga gikatag sa duha ka adlaw.
Sangkaon ni Asilo si Nasukawa nga way pilde sa upat ka away uban ang 2KOs.
"Taas nga panahon ug hard training ang amoang gihimo mao nang makaingon ko nga andam na kaayo ko sa umaabot nako nga away. Nabuhat nako ang angay nakong buhaton sa training ilabi na ang pag-master sa mga techniques nga gitudlo sa akong trainer aron gamiton nako puhon ibabaw sa ring," matud pa sa garbo sa Ubay, Bohol.
Sa miagi niyang pagkatkat sa ring, si Asilo mipatukay-ang ni Thai Surat Eaim Ong sud lamang sa duha ka hugna aron sakmiton ang WBO Oriental bantamweight belt niadtong Hulyo 27 didto sa Bohol Wisdom School (BWS) Gym sa dakbayan sa Tagbilaran.
Sa tinguha niyang makabira og laing rehiyonal nga korona, si Asilo nasayud nga usa ka malisud nga misyon ang pagpanulong sa teritoryo sa iyang kontra. Apan andam na kaayo siya nga sagubangon ang dakong hagit nga nag-atubang kaniya sa unahan.
"Akoa buhaton tanan nakong makaya ug ang amoa gipangandaman para ani nga duwa," pasalig pa ni Asilo.
- Latest
