Bolts, Beermen nakahiagum og managlahing kapalaran
CEBU, Philippines — Managlahi nga dalan ang giagian sa Meralco Bolts ug San Migueul Beermen pagsugod sa ilang kampanya sa EASL Season 2 niadtong Miyerkules sa gabii didto sa Mall of Asia Arena sa dakbayan sa Pasay.
Si Chris Newsome ug ang import nga si Allen Durham mikuha og atensiyon sa dihang gipakaging sa Bolts ang bag-ong salta sa liga nga Macau Black Bears, 97-85.
Si Newsome mihipos og 18 puntos ug unom ka assists samtang si Allen Durham miposte og double-double nga 17 puntos ug 11 ka rebounds.
Ang laing import sa Meralco nga si DJ Kennedy mihimo sab og kasikas uban ang 17 puntos, siyam ka rebounds ug walo ka assists samtang si Chris Banchero miamot og 14 puntos.
Ang naturalized player nga si Ange Kouame naparamdam sab sa Bolts bisan og bag-o pang nakabalik gikan sa injury human mitali og nuybe puntos ug milangkat og siyam ka rebounds.
Dili hinoon tanan pagmaya ang natagamtaman sa mga PBA teams gumikan kay ang Beermen giparotan sa Suwon KT Sonicboom sa Korean Basketball League, 87-81.
Si Rayshaun Hammonds maoy nangu sa Sonicboom bitbit ang 39 puntos ug 14 ka rebounds.
Si EJ Anosike mikolekta og 34 puntos ug pito ka rebounds samtang ang Sugbuanong higante nga si June Mar Fajardo mikadlit og 19 puntos ug siyam ka rebounds sa pilderong Beermen.
- Latest
