MPBA Season 3: Void mipatilaw og pilde sa Metro Cars

CEBU, Philippines — Si Jhon Rey Gequilan mipaulbo og 37 puntos sa dihang gitunolan sa Team Void ang Metro Cars sa una niining pilde, 98-92, sa Mandaue's Pride Basketball Association (MPBA) Commissioner's Cup Season 3 niadtong Sabado, Septiembre 28, didto sa Cebu Port Authority (CPA) Gym.

Gawas sa eksplosibo niyang opensa, si Gequilan mibira sab og walo ka rebounds, unom ka assists ug usa ka steal, samtang si Byron Lawton midugang og 21 puntos, unom ka rebounds ug tulo ka assists alang sa Void, nga padayong nagsolo sa ikaduhang puwesto sa Premier Division bitbit ang 4-1 nga baraha.

Nagparamdam sab si Doyle Molit sa Void uban ang 15 puntos, pito ka rebounds, usa ka assist ug usa ka steal.

Si Dwight Godinez mipupo og 20 puntos ug pito ka assists, samtang sila si Sanel Cabalda, Nikko Chavez, ug Albert Borling nagkumbinar og 45 puntos apan nakawang ang ilang paningkamot gumikan kay naputol ang lima ka sagunson nga daog sa Metro Cars.

Sa ubang mga duwa, ang Welec milampornas sa Urestore, 131-97, aron tablahon ang ilang rekord ngadto sa 3-3, samtang ang Matia's Foodhaus miinat sa ilang marka ngadto sa 2-2 human gilat-an ang Purexfit Cebu, 117-87.Si Etnies Gabato ang nangu sa Welec uban ang 22 puntos, upat ka rebounds ug duha ka assists.

Sila si Mark Monte ug Alexis Pedroso nagkumboya'g 29 puntos, sila si John Paul Banono ug Carlo Bacalso parehong mi-iskor og 11, samtang si Roel Turno miamot og 10 puntos sa balanseng ataki sa Welec. Wala sab magpabitin si Kyle Dajalos nga mipabuhagay og 35 puntos, pito ka rebounds ug unom ka assists alang sa Matia's. Nakakuha siya og igong suporta nilang Joshua Himang ug Winston Perez nga nakatigum og 36 puntos.

Sila si Fritz Dajalos ug Orly Rizane midonar og 14 ug 10 puntos alang sa Matia's.