Jerusalem Malampuson sa una niyang depensa

Midominar ni Castillo aron pagpabiling WBC champion

CEBU, Philippines — Tinuod sa iyang mga gipanulti, wala pakyasa ni Melvin Jerusalem ang iyang mga kababayan.

Si Jerusalem mibuntog sa Meksikano niining challenger nga si Luis Castillo pinaagi na impresibong unanimous decision aron pagpabiling World Boxing Council (WBC) minimumweight champion sa main event sa "Blow-by-Blow" nga promosyon ni Manny Pacquiao niadtong Dominggo sa gabii, Septiembre 22, didto sa Mandaluyong City College Gym.

Mipakita og dalaygong salida nga gikahimuot sa iyang mga fans, si Jerusalem mitumba ni Castillo gamit ang solidong right straight ngadto sa nawong sa nahibilin nga 26 segundos sa unang hugna. Nakahatag kini sa 30-anyos nga pambato sa ZIP-Sanman Boxing Gym og dugang kompiysansa ug kadasig aron dominahon ang kanhi way pildeng Meksikanong bisita sa nahibiling bahin sa 12 ka hugna nilang sangka.

Ang opisyal nga mga iskor mao ang 120-107, 120-107 ug 118-109 tanan pabot sa garbo sa Manolo Fortich, Bukidnon.

Mao kadto ang unang pagdepensa ni Jerusalem sa korona sa WBC nga iyang nasakmit human midaog pinaagi sa split decision batok sa Hapon nga si Yudai Shigeoka niadtong Marso 31 didto sa International Conference Hall sa Nagoya, Japan.

“Hindi ko minadali ‘yung laban kasi matibay ‘yung kalaban. Matibay si Luis. Hindi ko rin inaasahan ‘yung knockdown sa first round. Ginawa ko lang ‘yung game plan at training namin buong laban at ito ang kinalabasan,” matud pa ni Jerusalem, nga nagkupot na karon og 23-3 rekord uban ang 12KOs. Si Castillo nakatilaw sa una niyang pilde sud sa 23 ka away uban ang usa ka tabla ug 13KOs.

Sa laing resulta, si kanhi IBF super flyweight  champion Jerwin “Pretty Boy” Ancajas sa Panabo City naglampuson sa iyang pagbalik human gipilde si Sukpraserd Ponpitak sa Thailand pinaagi sa diskwalipikasyon sa ikalimang hugna.