Rain or Shine miabante sa quarterfinals

CEBU, Philippines — Ang Rain or Shine Elasto Painters maoy labing uwahing team nga miangkon og luna sa PBA Governors' Cup quarterfinals.

Kini human gipiog sa E-Painters ang NLEX Road Warriors sud sa overtime, 123-114, sa makutas ug kulbahinam nilang sangka niadtong Martes sa gabii didto sa Ninoy Aquino Stadium sa kaulohan.

Sila si Adrian Nocum ug Aaron Fuller maoy misalbar sa Elasto Painters sa dugang singko minutos sa aksiyon.

Si Nocum mitagak og pito sa iyang 11 puntos sa overtime nga nakapa-abante sa E-Painters og sayes puntos, 120-114, human mapapas ang 12 puntos nilang labaw sa regulasyon.

Sa iyang bahin, si Fuller milangkat og tulo ka krusyal nga offensive rebounds sa OT nga nakatabang sa RoS pagkab-ot sa mahinungdanong daog nga naggarantiya kanila og puwesto sa sunod nga bahin sa torneyo bitbit ang 6-2 win-loss record.

Sa kinatibuk-an, ang kugihan nga import sa E-Painters mihakot og 25 ka rebounds uban sa iyang 23 puntos.

Dako sab og naambag si Anton Asistio nga mipabuto og 25 puntos ingon man si Jhonard Clarito nga mihipos og 15 puntos, apil niini ang iyang follow-up shot gikan sa sipyat ni Nocum nga nakatabla sa iskor, 110-110, sa nahibilin nga  19.1 segundos sa katapusang kuwarter.

“Most important thing was gusto naming maka-six wins para makapasok sa quarterfinals,” matud pa ni coach Yeng Guiao.“We wanted to just try to win the game, overtime man yan, one point, 20 points. Importante manalo kami para maka-look forward sa playoffs. We accomplished it.”

Gawas nga mitikang sa Final 8, gibaraw sab sa RoS ang debut sa bag-ong import sa NLEX nga si DeQuan Jones kansang 49 puntos nakawang.