UV Green Lancers kampiyon sa Alegado Invitational Cup

CEBU, Philippines — Ang Univesity of the Visayas (UV) Green Lancers midominar sa University of the Philippines (UP) Cebu Fighting Maroons, 90-64, aron paglugwa nga labing unang kampiyon sa Mayor Teresa Alegado Invitational Cup Inter-Collegiate Basketball Tournament niadtong Miyerkules sa gabii, Septiembre 11, didto sa Consolacion covered  court.

Si Raul Gentallan mipaulbo og 20 puntos uban ang lima ka rebounds, lima ka assists ug tulo ka steals alang sa Lancers hinungdan nga siya maoy gipasidunggan nga Finals MVP.

Mitali si Ethan Maglasang og 13 puntos samtang ang kasamtangang Cebu Schools Athletic Foundation, Inc. (CESAFI) MVP nga si Kent Ivo Salarda midugang og 11 puntos alang sa Lancers, nga wala na molingi pa sukad miposte og 57-36 bentaha sa halftime dayon na ngadto sa pagbulsa sa P100,000 nga gating salapi.

Ang UP Cebu nakadawat og P50,000 sa pagpahiluna nila sa ikaduhang dapit.

Bisan og komportableng naglabaw, ang Lancers ni coach Gary Cortes padayong nanginit nga miresulta ngadto sa 26 puntos nga demolisyon sa Fighting Maroons.

Mao kadto ang ikaunom nga korona sa UV sukad sila nanghawod sa Bulacao Inter-Collegiate Basketball Tournament sa dakbayan sa Sugbo niadtong Pebrero.

Seguradong makapadasig kini og samot sa Lancers nga nagtinguha nga mokab-ot og laing "three-peat" sa giatngan nga CESAFI Season 24 nga gikatakdang mosikad karong Septiembre 21 diha sa Cebu Coliseum.

Si Marco Manoloto maoy bugtong double-digit scorer sa UP Cebu bitbit ang 10 puntos.

Sila si Brandon Sainz ug Jayboy Ocampo mi-iskor og otso puntos matag usa alang sa Fighting Maroons ni coach Rommel Rasmo, nga makahangad gihapon sa ilang ulo uban ang tumang garbo tungod kay nakatikang sila sa finals sa usa ka dakong torneyo sa labing unang higayon sukad sila niapil sa CESAFI sa miaging tuig.

Sa laing bahin, si Art Pepito mikolekta og 15 puntos, lima ka rebounds, unom ka assists ug tulo ka steals samtang sila si Clifford Hatamosa ug Jubings Alin nagkumboya'g 24 puntos sa dihang gibuntog sa Inday Dhapnie Lagon ang ABC Cordova, 112-107, sa usa ka exhibition game.