UP Cebu, USPF gisubhan og daog sa Alegado Cup
CEBU, Philippines — Ang University of the Philippines (UP) Cebu Fighting Maroons ug ang University of Southern Philippines Foundation (USPF)
Panthers miabli sa kampanya pinaagi sa usa ka masipang buto sa labing unang Alegado Mayor's Cup Inter-Collegiate Basketball Invitational Tournament niadtong Sabado sa gabii, Septiembre 7, didto sa Consolacion covered court.
Si JZ Dizon mipabuto og 22 puntos aron ituboy ang Fighting Maroons ngadto sa 69-57 nga pagpakaging sa University of San Carlos (USC) Warriors.
Sila si Matt Flores ug Kent Joshua Cabanlit nagkumboya'g 23 puntos alang sa UP Cebu, nga kanunay naggukod apan mitagak og makabungog nga 19-5 nga bomba sa katapusang kuwarter aron patikangkangon ang Warriors.
Si James Gica ang nag-inusarang double-digit scorer alang sa USC bitbit ang 11 puntos.
Sa laing bahin, si Jasper Lumingkit mikadlit og 15 puntos samtang sila si Janjan Peteros ug Mark Netos mitali og 14 puntos matag usa sa dihang gipayaka sa Panthers ang Cebu Roosevelt Memorial Colleges (CRMC) Mustangs, 82-74.
Ang Panthers alkansi og dos puntos sa halftime, 43-45, apan milusad og nagkayong 21-10 rally sa ikatulong kuwater aron ilogon ang labaw, 64-55, sa hingpit.
Si Jericho Montecalvo maoy nangu sa CRMC uban ang 12 puntos samtang sila si Jack Roa ug Earl Laniton parehong miposte og puntos sa pilderong kawsa.
- Latest
