NLEX umeskapo sa Phoenix
MANILA, Philippines — Kagaya ng naunang sinabi ni star guard Robert Bolick, kailangang itama ng NLEX ang kanilang pagrerelaks tuwing nakakakuha ng malaking kalamangan.
Kahapon ay nakalusot ang Road Warriors sa Phoenix Fuel Masters, 100-95, sa kabila ng sinayang na 23-point halftime lead sa PBA Season 49 Governors’ Cup kahapon sa Smart Araneta Coliseum.
“Give credit to them, they were able to read what we were doing. But also give credit to us that we were able to overcome that type of adversity,” ani NLEX coach Jong Uichico sa Phoenix.
Naglista si import Myke Henry ng 37 points at 9 rebounds para sa 2-0 kartada ng Road Warriors sa Group B, habang bagsak ang Fuel Masters sa 0-2 baraha.
Binuksan ng NLEX ang laro sa pagtatala ng 23-6 abante patungo sa paglilista ng 23-point advantage sa halftime, 53-30.
Ngunit sa likod nina import Jayveous McKinnis, Tyler Tio at RR Garcia ay nakalapit ang Phoenix sa 67-76 agwat sa pagsasara ng third period.
Napasakamay ng Fuel Masters ang 85-84 bentahe mula sa drive ni Jayvee Mocon sa 6:39 minuto ng fourth quarter bago nabawi ng Road Warriors ang 96-93 abante sa huling 1:18 minuto.
Ang layup ni Garcia ang muling nagdikit sa Phoenix sa 95-96 sa nalalabing 30.1 segundo, habang ang three-point shot ni Robbie Herndon ang muling naglayo sa NLEX sa 99-95 sa nalalabing 19.5 segundo.
Kapos ang tangkang four-point shot ni Jayjay Alejandro para sa Fuel Masters at ang free throw ni Henry sa huling 7.5 segundo ang sumelyo sa panalo ng Road Warriors.
“If there’s anything good that happened in today’s game it’s overcoming the adversity and not giving up and still maintaining our discipline and composure in the last minutes of the game,” ani Uichico. “ I can’t say the same when they (Fuel Masters) caught up and got the lead.”
- Latest
