Sa unang higayon sa susamang adlaw duha ka sugboanong boksidor mokumbati gawas sa nasud
CEBU, Philippines — Duha ka mga Sugbuanong boksidor ang mangindahay sa langyawng lapyahan sa labing unang higayon sa susamang adlaw karong Septiembre 7 sa managlahing teritoryo.
Kini mao sila si Bryx “The King” Piala sa ARQ Stable sa dakbayan sa Sugbo ug John Ver Espra sa Prime Fight Gym sa siyudad sa Talisay
Ang 22-anyos nga si Piala (9-1, 3KOs) makighilam-osay og kumo batok sa way pildeng Hapon nga knockout artist nga si Mikito Nakano (10-0, 9KOs) alang sa bakanting Oriental and Pacific Boxing Federation (OPBF) featherweight title didto sa Korakuen Hall sa Tokyo. Labaw sa korona, ang Talisaynon nga si Piala magsagubang og malisud nga tahas nga mao ang pagpakgang sa lima ka sunod-sunod nga pilde sa ARQ didto sa Japan, ang duha niini nahiaguman ni John Paul "Angas ng Cebu" Gabunilas.
Tunga-tunga sa sagunson nga kaparotan ni Gabunilas, ang igsoon ni Bryx nga si Rodex Piala ug ang lain pa nilang duha ka mga katropa nga sila si Yerroge Gura ug Bryan James Wild napakyas sab didto sa Japan.
Sa laing bahin, si Espra mopakita'g aksiyon gawas sa nasud sa unang higayon batok ni Orkhontungalag Unubold sa Mongolia sa usa ka non-title bout nga gikatakda sud sa unom ka hugna ubos sa flyweight division didto sa Incheon, South Korea.
Ang 26-anyos nga si Espra, lumad gikan sa dakbayan sa Mandaue, gikan sa tulo ka sunod-sunod nga kadaogan nga nag-inat sa iyang rekord ngadto sa 4-3 uban ang 2KO. Iyang sangkaon ang bag-ohanon nga Mongolian nga kausa pa milampos sud sa tulo ka duwa.
- Latest
