Polan nanghawod sa 2nd Bankal rapid chessfest

CEBU, Philippines — Si Reishi Boy Polan maoy gikoronahang kampiyon sa 2nd Bankal Chess Club Rapid Tournament nga gipahigayon ning bag-ohay pa lamang sa Mercato de Mactan sa may dalan Soong, Barangay Mactan, dakbayan sa Lapu-Lapu.

Gikumpleto ni Polan ang siyam ka hugna nga kompetisyon bitbit ang labing taas nga 8.5 puntos aron sakmiton ang titulo nga nagtangag og P4,000 nga ganting salapi.

Sila si Arena International Master Rogel Nino Panilagao, Janel Infante, Alberto Acabo, ug Edwin Cablao parehong miposte og 7.0 puntos apan si Panilagao ang mibulsa sa P3,000 nga premyo alang sa ikaduhang dapit tungod sa mas taas niyang tiebreaker.

Sila si Infante, Acabo, ug Cablao nakadawat og P1,500, P1,000, ug P700 sa pagtapos nila sa ikatulo ngadto sa ikalimang puwesto.

Naglangkob sa Top 10 mao sila si Roberto Calapan, Ralph Greval Dalauta, Joshua Panes, ug Rengie Momo uban ang 6.5 puntos ug Neal Amores bitbit ang 6.0 puntos.

Sa laing bahin, ang nanghawod sa tagsa-tagsa nila ka mga kategoriya mao sila si Carlos Moreno III (senior 55-above), Daren Corro (10 Under),  Triton Blue Ares Garcia (12 Under), Edgar Tampus Jr. (Bankal), ug Amarra Therese Otarra (female).

Giorganisa nilang Bankal Chess Club executive director Stephen M. Rosales ug Jonathan Mendola, ang usa ka adlaw nga torneyo nga nakahakot og 105 ka mga entrante nahimong posible tungod sa suporta sa Cebu Executives and Professionals Chess Association (CEPCA) nga gipangulohan ni Engr. Jerry Maratas, Rosales Rental, Mercato de Mactan, Event Asia, TESDA-7 Regional Director Engr. Vicente Gamaliel Jr., Meverett Water Refilling Station, ug Marjaztin Glass, Trading & Construction.