Insentibo ni Yulo miabot na ngadto sa P72 million
CEBU, Philippines — Ang ganting salapi nga nahakot ni Carlos Edriel Yulo nunot sa pagsakmit niya og duha ka gold medals sa bag-ohay pang natapos nga Paris Olympics 2024 miburot na ngadto sa P72 million.
Ang labing uwahing grasya nga mitupa sa mga kamot ni Yulo mao ang P5M nga regalo gikan ni kanhi Ilocos Sur Governor Chavit Singson, dugang P8M gikan sa House of Representatives, ug wala gibutyag nga kantidad gikan ni boxing hero Manny Pacquiao.
Atol sa usa ka welcome ceremony alang sa mga Pinoy Olympians didto sa Malacañang niadtong Martes sa gabii, si Presidente Ferdinand Marcos Jr. mitunol ni Yulo og P20M nga bonus alang sa makasaysayanon niyang kalamposan nga nakahatag og makabungog nga kalipay ug dungog sa tibuok nasud.
Sa susamang okasyonm ang Philippine Sports Commission (PSC) mipresenta ni Yulo og dugang P20M nga insentibo sigun sa nalatid sa balaod.
Sa kinatibuk-an, si Yulo makadawta og P14M gikan sa House of Representatives, P5M gikan sa Arena Plus, P3M matag usa gikan sa Megaworld Corporation ug Bounty Fresh/Chooks To Go, ug P2M gikan sa kagamhanan sa Manila.
Gawas pa kini sa condominium unit gikan sa Megaworld nga mibalor og P32M, house and lot sa Tagaytay gikan ni Philippine Olympic Committee (POC) President Abraham ‘Bambol’ Tolentino, ug laing house and lot sa Nasugbu, Batangas kortesiya sa Century Properties Group.
Daghan pa ang maabot alang ni Yulo ilabi na kay ang MVP Sports Foundation ug San Miguel Corporation gikatakda pa nga mopahibawo pa pinansiyal nilang pahalipay alang sa double Olympic champion.
- Latest
