Chargers dikit na sa top spot sa q’finals

MANILA, Philippines — Patuloy ang ratsada ng Akari matapos talunin ang Nxled, 21-25, 25-19, 25-17, 25-18, sa Pool D sa crossover second round ng 2024 Premier Volleyball League (PVL) Reinforced Confe­rence kahapon sa Philsports Arena sa Pasig City.

Ang pang-pitong sunod na panalo ng Chargers ang naglapit sa kanila sa No. 1 spot sa knockout quarterfinals, habang bagsak ang Chameleons sa 1-6 record.

Hindi nakontrol ni Akari setter Mich Cobb ang kanyang emosyon at umiyak sa post game interview bilang Best Player of the Game.

“I think parang the past week din parang there’s been a lot of things going on with our team, siyempre challenges. I’m just so happy that we were able to surpassed it and still get wins din,” ani Cobb na nag­lista ng 18 excellent sets.

Humataw si American import Oly Okaro ng 30 points mula sa 28 attacks, isang ace at isang block at may 19 markers si Ivy Lacsina.

Binanderahan ni American reinforcement Meegan Hart ang Nxled sa kanyang 16 points habang may 11 markers si Chiara Permen­tilla.

Sa unang laban, pini­gilan ng Farm Fresh ang pagpasok ng Capital1 Solar Energy sa quarterfinal matapos kunin ang 25-17, 25-23, 25-20 panalo.

Tinapos ng Foxies ang kanilang two-game lo­sing skid para itaas ang kartada sa 3-4 at buhayin ang tsansa sa quarterfinals.

Bigo ang Solar Spikers na maiguhit ang ikaapat na dikit na ratsada para sa 4-3 marka.

Pumalo si Colombian import Yeny Murillo ng 15 points mula sa 13 attacks at dalawang service aces para sa Farm Fresh habang may 12 markers si Trisha Tubu at tig-siyam na puntos sina Caitlin Viray at Rizza Cruz.