Team USA misakmit sa ikalimang sagunson nga basketball gold

CEBU, Philippines — Ang Team USA mipayaka sa host France, 98-87, aron langkaton ang ikalima nilang sagunson nga men's basketball gold medal sa Olympics.

Sa kinatibuk-an, ang US aduna nay 17 ka bulawang medalya sa Olympics human sa ilang dominasyon didto sa Paris.

Sa rematch sa Tokyo Olympics final tulo ka tuig na ang milabay, si LeBron James ug ang US team nga namongingi og mga bitoon sa NBA mipamatuod nga mas gamhanan sila sa France bisan pa man sa impresibong salida ni NBA Rookie of the Year Victor Wembanyama.

Kontrolado sa US ang duwa sukad sila niposte og 14 puntos nga bentaha, 61-47, sa sayong bahin sa ikatulong kuwarter.

Ang France igo lamang nakasikit ngadto sa tres puntos human sa dunk ni Wembanyama sa nahibilin nga 3:04 sa duwa gumikan kay si Golden State Warriors superstar Stephen Curry milansang og hagpok kaayong 3-pointer nga nakapagihawa og lawom sa mga Amerikano.

Usa lamang kadto sa upat ka krusyal nga mga tres nga gibomba ni Curry sa pinal nga tres minutos nga nagtuboy sa US ngadto sa naglagiting nga kalamposan.

Si Curry mitagak og walo ka tres aron pangulohan ang US bitbit ang 24 puntos.

"You just simply marvel. Having him on your side, you just try to get stops and figure out other ways on the other end but keep finding him, keep getting him the ball," matud pa ni James agi'g pagdayeg ni Curry, nga nakadaog sa una niyang Olympic gold.

Sila si Kevin Durant ug Devin Booker midugang og 15 puntos matag usa samtang si James mihipos og 14 puntos, unom ka rebounds, 10 ka asssists, usa ka steal ug usa ka block.

Si Durant ang labing malipayon nilang tanan human misakmit og rekord nga ikaupat nga gold medal sa Olympics. Samtang si LeBron mapasigarbuhon sa ikatulo niyang bulawan.

Si Wembanyama maoy nangu sa France uban ang 26 puntos, samtang si Guerschon Yabusele mibubo og 20 puntos sa pilderong kawsa.

"I will be going for gold in four years' time," pasalig pa ni Wembanyama, nga naka-silver dayon sa una niyang pagkumbati sa prestihiyosong torneyo nga mahitabo kausa lamang sud sa upat ka tuig.

Sa sangka alang sa ikatulong dapit, ang Serbia midominar sa World Cup champion Germany, 93-83, aron birahon ang bronze medal.

Si three-time NBA MVP Nikola Jokic sa Denver Nuggets mirehistro og triple double uban ang 19 puntos, 12 ka rebounds, ug 11 ka assists alang sa Serbia.