Gazz Angels sinisiw ang Thunderbelles
![Gazz Angels sinisiw ang Thunderbelles](https://media.philstar.com/photos/2024/07/18/gazz_2024-07-18_20-59-51.jpg)
MANILA, Philippines — Winalis ng nagdedepensang Petro Gazz ang ZUS Coffee, 25-16, 25-21, 25-21, sa Pool B ng 2024 Premier Volleyball League (PVL) Reinforced Conference kahapon sa Philsports Arena sa Pasig City.
Pumalo si 2024 PVL All-Filipino Conference MVP Brooke Van Sickle ng 22 points mula sa 18 attacks, tatlong service aces at isang block sa pagbandera sa Gazz Angels.
“We stayed calm and collected, stayed together as a team,” sabi ni Van Sickle na naglista rin ng 11 excellent digs.
Nagdagdag si import Wilma Salas ng 15 points galing sa 12 attacks bukod sa 12 excellent receptions.
Inialay ni Salas ang panalo sa kaibigang si Janisa Johnson na namatay dahil sa colon cancer noong Mayo 24 sa edad na 32-anyos.
Naglaro ang Thunderbelles na wala si No. 1 overall pick Thea Gagate na nakahugot kay Japanese import Asaka Tamaru ng 17 points.
Nag-ambag sina Michelle Gamit at Jade Gentapa ng tig-pitong marka para sa ZUS Coffee na kinuha ang 21-19 abante sa second set bago nagtuwang sina Van Sickle, Salas at Jonah Sabete para sa 25-21 panalo ng Petro Gazz.
Sa ikalawang laro, pinabagsak ng Akari ang Capital1 Solar Energy, 25-18, 27-25, 22-25, 25-14.
Nagtuwang sina American import Oly Okaro, Ivy Lacsina at Ced Domingo sa fourth set para sa panalo ng Chargers sa Pool B.
Humataw si Lacsina ng 20 points mula sa 20 attacks habang may 16 markers si Okaro buhat sa 14 attacks, isang ace at isang block.
Pinamunuan ni Russian import Marina Tushova ang Solar Spikers sa kanyang 20 points mula sa 17 hits, dalawang blocks at isang ace.
Nag-ambag sina No. 2 overall pick Leila Cruz, Iris Tolenada at Lourdes Clemente ng tig-pitong marka.
- Latest