Bosconians naghari sa SHAABAA Inter-Alumni Games

CEBU, Philippines — Ang Don Bosco Cebu Alumni Basketball League (DBCABL) selection mipakaging sa Magis team sa Sacred Heart Ateneo Alumni Basketball Athletic Association, 75-66, aron paglugwa nga kampiyon sa labing unang SHAABAA Inter-Alumni Invitational Games niadtong Dominggo Hulyo 14, didto sa Benedicto College gymnasium sa may dalan A.S. Fortuna sa dakbayan sa Mandaue.

Nanginit si John Velasco aron pagtuboy sa Bosconians ngadto sa korona uban ang 23 puntos ug usa ka assist. Sila si Kristian Henry Alejandrino ug Chrissar Llegunas mihimo sab og kasikas human nagkumbinar og 25 puntos.

Si Franco Te maoy nangu sa Magis bitbit ang 15 puntos, samtang sila si Bernard Chioson ug Bradley Bacaltos milansang og 13 puntos matag usa sa pilderong kawsa.

Sa sangka alang sa ikatulong dapit, ang SHAABAA Eagles nagsandig sa mainit nga mga kamot nilang Rendell Senining ug Benedict Andre Chua aron patikalbongon ang University of San Carlos-North Alumni Basketball Conference (USC-NABC),95-87.

Mipabuhagay si Senining og 30 puntos, walo ka assists, upat ka steals ug usa ka block, samtang si Chua mibubo og kuwatro puntos, upat ka rebounds, usa ka assist, ug usa ka block.

Si Elddie Cabahug mikadlit og 19 puntos, samtang sila si Ervin Lopena ug Jair Igna mipupo og 10 puntos matag usa alang sa balanseng ataki sa Eagles.

Nakamugna si King Osabel og double-double nga 25 puntos ug 12 ka rebounds uban ang unom ka assists alang sa USC-NABC. Sila si Enrico Llanto ug Gio Pardillo parehong mitali og 12 puntos apan nakawang ang ilang paningkamot alang sa Carolinians.