Team USA wagi sa Canada sa tune-up
LAS VEGAS — Umiskor si Anthony Edwards ng 13 points habang may 12 markers si Stephen Curry sa 86-72 paggupo ng United States sa Canada sa pagsisimula ng kanilang tune-up schedule para sa 2024 Paris Olympics.
Nag-ambag si Jrue Holiday ng 11 points at may 10 markers si Anthony Davis para sa Team USA na may apat pang exhibition games bago magtungo sa France.
Pinamunuan ni RJ Barrett ang Canada sa kanyang 12 points kasunod ang 10 markers nina Shai Gilgeous-Alexander at Dillon Brooks.
Sinimulan ng mga Canadians ang laro sa 11-1 abante bago naagaw ng mga Americans ang 41-33 bentahe sa halftime na kanilang pinalobo sa 69-54 papasok sa fourth quarter.
Sunod na lalabanan ng Team USA ang Australia sa Abu Dhabi, United Arab Emirates sa Martes.
Samantala, hindi na sasama si Kawhi Leonard ng Los Angeles Clippers sa Team USA dahil sa kanyang right knee injury at papalitan ni Boston Celtics guard Derrick White.
- Latest
