Salas balik sa Gazz Angels

MANILA, Philippines — Magbabalik sa Pilpinas si Cuban wing spiker Wilma Salas na inaasahang magpapasabog ng malulupit na atake sa Premier Volleyball League (PVL) Reinforced Conference.

Muling hinugot ng Petro Gazz si Salas para magsilbing import at upang tulu­ngan ang kanilang tropa sa Reinforced Conference na papalo sa Hulyo 16.

Kilala na si Salas sa Philippine volleyball bilang isa sa pinakamahusay na foreign guest player.

Tinulungan nito ang Gazz Angels na masungkit ang korona sa PVL Reinforced Conference noong 2019 edisyon ng lliga.

Itinanghal din itong Best Foreign Guest Player sa naturang kumperensiya.

“She’s back! The 2019 PVL Reinforced Confe­rence Best Foreign Guest Player awardee who led the Petro Gazz Angels to a championship will refuel our journey this Reinforced Conference. Welcome back, Wilma Salas,” ayon sa post ng Gazz Angels sa kanilang social media.

Ang 6-foot-2 outside hitter ay galing sa matikas na kampanya sa Poland kung saan naglaro ito para sa Chemik Police at sa Greece kasama ang Olympiacos S.F. Piraeus.

Inaasahang madadala nito ang kanyang malalim na karanasan upang buhatin ang Gazz Angels sa panibagong titulo.

Makakasama ni Salas sa ratsada ng Gazz Angels sina Brooke Van Sickle, Aiza Maizo-Pontillas, MJ Phillips, Myla Pablo, Jonah Sabete, Remy Palma at playmakers Chie Saet at Djanel Cheng.

Makikipagsabayan si Salas sa matitikas na imports tulad nina Khat Bell ng Chery Tiggo, MJ Perez ng Cignal, Lena Samoilenko ng PLDT at Asaka Tamaru ng ZUS Coffee.