Warriors Basketball Academy: Coach Jeff Codera nakauban ang mga NBA players sa Golden State

CEBU, Philippines — Ang Sugbuanong basketball skills trainer nga si Jeff Codera dunay laing nakab-ot nga bililhon sa iyang karera.

Ning bag-ohay pa lamang, naka-uban ni Codera ang mga NBA players sa Golden State nga sila si

Brandin Podziemski ug Moses Moody sa pagpaambit sa ilang mga nakat-onan ngadto sa mga partisipante sa Warriors Basketball Academy Overnight Camp nga gipahigayon didto sa karaang Warriors training facility sa Oakland, California.

Atol sa upat ka adlaw nga clinic nga gipasiugdahan nilang Golden State Warriors Basketball Academy Vice President Jeff Addiego ug Senior Manager Ben Clarfield, si Codera ug ang kauban niyang mga trainers ug coaches mitudlo ngadto sa mga basketbolista nga nag-edad og nuybe ngadto sa 15 anyos sa ensaktong pamaagi sa pagduwa sama sa ball handling, shooting, passing, one-on-one play ug uban pa.

Midugang si coach Jeff nga gihatagan sab sila og tsansa nga mosulti og makapadasig nga mensahe ngadto sa mga campers diin ilang gisabwag sa dughan sa mga batan-ong magduduwa ang respeto, disiplina, ug maayong pamatasan sa sud ug gawas sa korte nga ilang magamit sa mga duwa ingon man sa inadlaw nilang kinabuhi.

"A fun-filled experience, the academy provided each camper an opportunity to work on their game, improve their skills, and play the right way," matud pa ni Codera, nga sakop sa Warriors training camp sud sa usa na ka dekada.

"More than enhancing their skills level, the campers were taught on the right values which they can use not only in games but also in their daily life," dugang pa sa garbo sa Tabok, Mandaue City nga nabantog sab nga "Man of a Million Drills".

Alang sa 42-anyos nga si Codera, espesyal ug mahinungdanon kaayo alang sa tanan nga nahimong kabahin sa overnight camp gumikan kay gipahigayon kini agi'g kasaulogan sa ika-25 nga anibersayo sa Warriors Basketball Academy sa paghashas niini og mga talento didto sa Bay Area.

“I am truly thankful to God for this wonderful blessing," dason pa ni Codera, nga sa kasamtangan maoy asketball head coach ug sports consultant sa lungsod sa  San Remigio, amihanang bahin sa Sugbo. "As a Filipino, I’m very proud to be part of such a momentous event that I will surely cherish in my lifetime."