LeBron magpabilin sa Lakers

CEBU, Philippines — Si LeBron James mobalik sa Los Angeles sunod season human miuyon sa bag-ong duha ka tuig nga kontrata uban sa Lakers nga mibalor og $104 million.

Dili na hinoon usa ka surprisa ang lakang ni James ilabi na kay ang 19-anyos niyang anak nga si Bronny gikuha nga No.55 pick sa Lakers sa NBA Draft naidto lamang miaging semana.

Ang 39-anyos si James daan nang mipahibawo sa iyang tinguha nga moduwa sa NBA kauban ang iyang anak.

Kon ugaling mahitabo na, mao kini ang labing unang higayon sa kasaysayan sa NBA nga ang usa ka amahan ug anak moduwa sa usa ka team.

Sa lab-as nilang kasabotan, si James dili puyde i-trade sa Lakers kon way pagtugot gikan kaniya.

Si James, ang all-time leading scorer sa NBA nga nakampiyon upat ka higayon, mosud sa ika-22 niyang season sa liga.

Iyang gipangulohan ang Lakers ngadto sa korona niadtong 2020 apan nagkagidlay na sila sukad niadto.

Sa miaging tuig, ang Lakers gitagak sa Denver Nuggets sa unang hugna sa playoffs.