Celtics ibaligya sa mga tag-iya
CEBU, Philippines — Ang mga tag-iya sa NBA champion Boston Celtics mipahibawo kagahapong adlawa nga ilang ibaligya ang ilang team.
Makapakurat kini nga lakang gumikan kay duha ka semana pa lamang ang milabay sukad ang Celtics mikulit og kasaysayan uban ang rekord nilang ika-18 nga kampiyonato.
Ang Celtics dunay balor nga $4.7 billion niadtong Okrubre sa miaging tuig sigun sa Forbes magazine.
Sila maoy ikaupat nga labing datu nga koponan sa NBA sunod sa Golden State Warriors ($7.7 billion), New York Knicks ($6.6 billion) ug Los Angeles Lakers ($6.4 billion).
Si Wyc Grousbeck maoy nangu sa grupo nga mipalit sa Celtics niadtong 2002 sa kantidad nga $360 million.
Daw nauso na karon ang pagpamaligya sa NBA teams sa mas mahal nga presyo.
Ang Phoenix Suns gipalit ni Mat Ishbia niadtong Pebrero 2023 sa kantidad nga $4 billion samtang sila si Jimmy ug Dee Haslam napalit ang dakong bahin sa Milwaukee Bucks sa kantidad nga $3.5 billion sa miaging tuig.
Ang Dallas Mavericks gibaligya niadtong Disiembre ngadto nilang Miriam Adelson ug Patrick Dumont sa presyo nga $3.8 billion. (BANAT NEWS)
- Latest
