Chris Paul gikuha sa Spurs, Harden pabilin sa Clippers

CEBU, Philippines — Si Chris Paul makig-alyansa ni Victor Wembanyama didto sa San Antonio sa sunod nga NBA season human siya miuyon sa usa ka tuig nga kontrata nga mibalor og $11 million uban sa Spurs.

Tungod niini, ang 12-time NBA All-Star nga miduwa sa Golden State Warriors sa miaging season magsilbe sa ika-20 niyang season sa liga didto sa Texas diin siya mangindahay pagkab-ot sa gihandum niyang unang kampiyonato.

Ang 39-anyos nga si Paul wala kaayo gigamit sa Warriors sa miaging tuig diin siya nakapakita'g aksiyon sud lamang sa 18 ka duwa bitbit ang average nga 11.9 puntos ug 7.3  assists.

Gibira dayon sa Spurs si Paul human kini gibuhian sa Warriors.Gawas ni Paul, mawala na sab unya sa poder sa Warriors si Klay Thompson nga usa na karon ka free agent.

Ang 13 ka tuig nga beterano sa NBA lagmit adto mapunta sunod sa Dallas Mavericks, Philadelphia 76ers, Los Angeles Clippers o dili ba sa LA Lakers nga pulos interesado kaniya.

Si Lakers superstar LeBron James namahayag nang daan nga andam siyang magsakripisyo sa iyang suweldo aron lamang makasud sa ilang team ang dekalibreng free agents sama nilang Thompson ug Paul George, nga gisaytan sa 76ers ug Orlando Magic.

Si James usa na sab ka free agent apan ang four-time NBA champion naglantaw og laing kontrata sa Lakers aron makauban ang anak niyang si Bronny sunod season.

Sa laing bahin, si James Harden nagpahigot sa LA Clippers ubos sa duha ka tuig nga kontrata nga nagkantidad og $70 million. Samtang si Kevin Love magpabilin sa Miami Heat sud sa duha ka seasons pinaagi sa kontrata nga nagkantidad og $8 million.